Lekeitioko Euskal Zine Bilera pantaila guztietatik jarraitu ahalko da aurten
Lehiaketan izena emateko epea irailaren 13ra bitartean egongo da zabalik. Azaroaren 21etik 29ra bitartean ospatuko da jaialdia.
42. EZBko saridun guztiak. Argazkia: Euskal Zine Bilera Lekeitioko 43. Euskal Zine Bilerak bere lehiaketa ireki du gaur [maiatzak 28]. Jaialdiaren egitura mantendu egingo dute, baina osasun larrialdia dela eta, ikusle eta zaleen ongizatea bermatzeko asmoz, Euskal Zine Bilerak sare bidezko izaera bereganatuko du aurten. “Modu honetan, Euskal Zine Bilera edozein pantailatik jarraitzeko aukera izango dute zaleek eta Lekeitiora etorri ezin duen jendeari ate berriak irekiko zaizkio”, adierazi dute.
Azaroaren 21etik 29ra bitartean ospatuko da Euskal Zine Bilera, eta lehiaketan izena emateko epea irailaren 13ra bitartean egongo da zabalik. Aurkezten diren lanen artean, 20 bat aukeratuko dituzte lehiaketan parte hartzeko, eta lehiaketarako aukeratuak izaten diren horiek 200 euroko saria jasoko dute, “egindako lana eskertu asmoz”.
Lehiaketan zuzendaritza, gidoi eta film onenaren sariak banatuko dituzte, eta gainera, ikusleek ere lan bakoitzari puntuak emateko aukera edukiko dute eta ikuslearen sari berezia norentzat izango den erabaki. Ondorengoak izango dira sariak:
- Zuzendaritza onena 1.600 euro
- Gidoi onena 1.600 euro
- Film onena 1.900 euro
- Ikusleen saria 750 euro
Bide beretik. Aurreratu dutenez, azken urteetako garapenagaz jarraituko du jaialdiak: “Bere barruko atalak indarberrituko ditu, hainbat berrikuntza aurkeztuz”. Era berean, euskal ikus-entzunezkoaren iragana, orainaldia eta etorkizuna lantzen jarraituko dute. Eta, ohi modura, euskarazko ikus-entzunezkoen markoaren barnean aurkitzen diren eragileekin lanean jarraitzea dute asmoa: “profesional, amateur edota zaleen errealitateak hobeto ezagutzeko eta interesa izan ahal duten pertsonak erakartzeko”.
Ezohiko egoera batean egonda, aurten, Lekeitiorentzat eta euskal zinemako profesional eta zaleentzat hain garrantzitsua den jaialdia ospatu ahal izateko esfortzu berezia egingo dela azaldu dute. Hala ere, erronka horrek “etorkizunera begirako tresna baliagarriak ondorioztatzeko leihoa” zabalduko duela adierazi dute.
