EHIGE: "Ezin gara konformatu normaltasun egoera batera bueltatuko garela dioen planifikazio batekin"
Hezkuntza Saileko ordezkariak Euskal Herriko Ikasleen Gurasoen Konfederazioagaz (EHIGE) batu zen atzo [ekainak 3] irailerako asmoen berri emateko. EHIGEk esan du eurentzako prozedura diskretu bat zena, komunikabideetan argitaratu dela gaur [ekainak 4].
Eusko Jaurlaritzak irailean ikasturtea “normaltasunez” hasteko aurreikuspena egin eta gero, Hezkuntza Saileko ordezkariak Euskal Herriko Ikasleen Gurasoen Konfederazioagaz (EHIGE) batu zen atzo irailerako asmoen berri emateko. “Bilera horretan, datorren ikasturteko plana hezkuntza eragileekin kontrastatzeko asmoa zuela azaldu zigun Sailak. Gure ustez prozedura diskretu bat zena, komunikabideetan argitaratu da gaur [ekainak 4]”.
Esan dutenez, atzo plan horren zehaztapen batzuk ezagutu zituzten, baina informazio gehiago jaso ahala, balorazio zorrotza egingo dutela esan dute. “Momentu honetan ez ditugu baloratuko zehaztapen horiek”.
Esan dute familiek ikasle guztiak ikastetxeetara bueltatzea nahi dutela, orain arteko ordutegi eta zerbitzu berdinekin eta sortu diren behar berriei erantzungo dieten baliabide berriekin; baliabide horiek aurtengo galerak errekuperatzeko eta etorkizunean gerta daitezkeen egoera berriei erantzuteko balio beharko dutela gaineratu dute.
“Honek esan nahi du ezin garela konformatu normaltasun egoera batetara bueltatuko garela dioen planifikazio batekin. Hori dela eta, urruntze eta prebentzio neurriei egokitutako plan bat egiten hasi behar da berehala Hezkuntza Saila. Orain erlaxatzen bagara pentsatuaz normaltasunera bueltatuko garela, ez digu denborarik emango ikastetxeak modu egoki batean planifikatzeko”.
