Hamaika Gararen deialdiagaz bat egingo dute Lea-Artibain
Plazak aldarriz betetzeko deia egin du Hamaika Garak domekarako. Parte-hartzaile bakoitzak bere aldarria kartoi zati batean idatzi eta etxetik plazara eramango du.
Argazkia: Gure Esku Plazak aldarriz betetzeko deia egin du Hamaika Garak domekarako [ekainak 7], eta ekimen horregaz bat egingo dute Lea-Artibaiko hainbat herrietan ere. COVID-19ak eragindako geldialdiaren ondoren, herritarrek eta aldarrikapenek plaza publikoa berreskuratzeko garaia dela uste dute: “premiazkoa da bizi dugun eta datorren krisiari Euskal Herritik eta guztion artean erantzun behar diogula adieraztea, eta tokiko erabaki burujabeak aldarrikatzea”.
Hemen erabaki, herritarrok erabaki lelopean egingo den ekimen bateratu horren bidez, herri eta hirietako plazak aldarriz betetzea dute asmoa. Horretarako, 11:00etatik 14:00etara, parte-hartzaile bakoitzak bere aldarria kartoi zati batean idatzi eta etxetik plazara eramango du, lurrean utziz.
Etxebarrian, Plaza Barrin egingo da ekintza, Lekeition, udaletxeko eskaileratan; Ispasterren, kanpoko frontoian; Mendexan, plazan, eta Markina-Xemeinen Zelaian edo Plazabarripean, eguraldiaren arabera. Markina-Xemeinen, gainera, 12:00etan hasiko da ekimena. Ondarroan, berriz, ekimena Itsas Aurren egingo dute. Herri dinamikako kideek agertu dutenez, pasealekuko zuhaitzetan ipiniko dituzte soketan eskegiko dituzte aldarrikapenak. “Aldarriak etxetik eginda ekarri ezin dituztenentzat orri eta margo batzuk edukiko ditugu eskura, beti ere osasun berme guztiak mantenduta”. Ondarrutarrek argazkiak ateratzeko asmoa badutela ere agertu dute. “Euren aldarriekin etortzen direnei aldarria eskegi aurretik argazki bat ateratzen ahaleginduko gara. Horiek gero sare sozialetan elkarbanatuko ditugu”.
Etenaldia. Gure Eskuk, gizarteko alor askotako eragile ugarirekin batera, Hamaika Gara egitasmoa jarri zuen abian martxoaren 11n. Erreferendumaren aldeko sinadura bilketa bat ardatz hartuta, epe luzeko ibilbide bati ekin zioten hamaika eragilek, burujabetza eta erabakitzeko eskubidea sustatzeko asmoz. Egitasmoa aurkeztu eta gutxira, COVID-19aren aurkako neurriak ezarri zituzten gobernuek, eta horren ondorioz, sinadura bilketa aldi batez sustatzeari utzi, eta aurreikusitako kale mobilizazioak udazkenera atzeratzea erabaki zuten sustatzaileek.
Orain, berriz, ekimen honen ondoren, erreferendumaren aldeko sinadura bilketa berrartuko dutela iragarri dute, eta udazkenetik aurrera kanpaina indartzen hasiko dira.
