Irailean ikasturtea normaltasunez hastea aurreikusten du Eusko Jaurlaritzak
Maila guztietan eta gela murrizketarik gabe hasiko litzateke, dena ondo badoa, irailaren 7an. Jangela eta garraio zerbitzuak normaltasunez hastea ere aurreikusten du, baina DBHko eta Batxilergoko ikasleek ordutegi jarraitua izango lukete, etxean bazkaldu dezaten.
Zenbait hedabidek aurreratu dutenez, Eusko Jaurlaritzako Hezkuntza Sailak aurreikusten du 2020-2021 ikasturtea normaltasunez hastea. Ondo bidean, irailaren 7an maila guztietan hasiko litzateke ikasturtea, eta gela murrizketarik gabe; hau da, ikasle kopuru osoarekin. Gainera, garraio eta jangela zerbitzuak ere osasun krisia hasi aurreko baldintzatan jarriko lirateke martxan. Hori bai, DBHko eta Batxilergoko ikasleek ordutegi jarraitua izango lukete, etxean bazkaldu dezaten. Haur eta Lehen Hezkuntzako ikasleak goiz eta arratsalde joango lirateke eskolara.
Hiru hilabete falta dira ikasturtea hasteko, baina Hezkuntza Sailak lehenbailehen nahi du erabaki ikasturte hasieraren inguruan. Aurreratu du oraindik ezin dutela zehaztu zer segurtasun baldintza izango diren, baina printzipioz ez dute aurreikusten ikasleek maskarak eta segurtasun distantziak erabili eta mantendu behar izatea.
Dena dela, Hezkuntza Sailak ikastetxeei eskatu die beste bi ere prestatzeko, badaezpada: bat eskola presentzialekin baina murrizketekin, eta beste bat Internet bidezko eskolekin. Eta, horrekin batera, batetik bestera egokitzeko ere prestatzeko eskatu die. “Hiru jokalekuekin ari gara lanean, prest edukitzeko nolakoak izan beharko luketen eta batetik besterako aldaketak egonez gero ikastetxe bakoitzak zer egin beharko lukeen”, adierazi diote sail horretako iturriek Efe albiste agentziari.
