Markina-Xemeingo Berakruz ikastolak ikasturte amaiera ospatuko du
Era askotako ekintzak antolatu dituzte, egoerara egokituta. Zuzeneko irratsaioa egingo dute zapatuan [ekainak 6] ikastolatik.
I. Binke Trail martxako partaideak helmugaratzen. Argazkia: Bera Kruz Ikastola Egoera ohikoa ez den arren, ikasturteari amaiera polit bat eman nahi izan diote Markina-Xemeingo Berakruz ikastolan. Urtero, ekainaren lehen asteburuan ikasturte amaierako jaialdia ospatzen dute, eta, aurten ere, horrela egitea erabaki dute, alarma egoeraren segurtasun neurriek ahalbidetzen duten ekimenak antolatuz.
Ekintza erraz, erakargarri eta batez ere parte hartzaileak antolatzea eduki du helburu ikastolako jai batzordeak. Aitziber Zuazo batzorde horretako kideak azaldu duenez, ekimen batzuk aurretik antolatu dira, eta zapatuko [ekainak 6] jaialdirako utzi dituzte beste batzuk.
Aurretik egin dituztenen artean, Tontorrera igoera, balkoi eta leihoen apainketa, mozorro lehiaketa eta bertso txapelketa aipatu ditu. Gogora ekarri duen modura, urtero, Binke izeneko mendi martxa antolatzen dute. Horren ordez, Markina-Xemein inguruko hiru tontor proposatu dituzte aurten, eta martxako kamiseta soinean, bertara joan eta argazkia atera behar izan dute parte hartzaileek, han egon direla erakusteko. Beste ekintza guztietako argazki eta bideoak ere bidali behar zituzten, eta horiekin bideo txikiak prestatu dituzte. Horrez gain, parte hartzaileen artean zozketa bat egin eta sariak banatuko dituzte. “Aipamen batzuk egingo dira, baina ez dago irabazlerik. Parte hartzea da nahi genuena, eta beraz, ekintza bakoitzeko partaideen artean zozketa bat egin eta irabazleak herriko establezimenduetan gastatzeko bonua eskuratuko du”.
Zapatuan, bestalde, Bizkaia Irratiaren zuzeneko irratsaio bat egingo da ikastolatik bertatik, 11:00etatik 13:00etara. Marrazki txapelketa bat ere edukiko dute, eta guraso eta irakasleek egin dituzten lanak eraman eta ikastola apainduko dute. Jaialdia 14:00ak arte luzatuko da.
Orain arteko parte hartzea oso ona izan dela jakitera eman du Zuazok, eta zapatuan ere hala izatea espero dute.
