Gizon bat atxilotu dute Markina-Xemeinen gasolindegi batean lapurtzeagatik
Gasolindegi bateko dendan olio lata bat eta janaria eta kamioi batetik takografo irakurle bat lapurtzea egotzi diote.
28 urteko gizon bat atxilotu dute Markina-Xemeinen, gasolina zerbitzugune bateko dendan olio lata bat eta janaria eta kamioi baten barrutik takografo irakurle bat lapurtzea egotzita.
Eusko Jaurlaritzako Segurtasun Sailak jakitera eman duenez, gertakariak zapatu [ekainak 6] goizeko hamarrak aldera izan ziren. Jakinarazi dutenez, gizon batek ibilgailuentzako olio bidoi bat, ogitarteko bat, garagardo lata bat eta txokolatina batzuk hartu eta ordaindu barik alde egin zuela azaldu zion Ertzaintzari Markina-Xemeingo errepideko zerbitzugune bateko langileak.
Patruila bat bertaratu zen langileak eman zitzakeen datuak jasotzera, eta, une horretan, agenteei jakinarazi zieten establezimenduaren ondoko Kareaga industrialdean gizon bat aparkatutako ibilgailuen artean zebilela.
Ertzainek gizonezko bat aurkitu zuten, eta haren autoa miatu ondoren, maletategian mendi moduko txamarrak, ibilgailuentzako olio lata bat eta takografo irakurgailu bat aurkitu zituzten. Objektu horiek kamioiaren titularrarenak zirela ikusita, agenteek ustezko lapurra atxilotu zuten.
Atxilotuari zerbitzu estazioan lapurreta egitea eta kamioiaren barruan lapurreta egitea leporatzen diote, eta ertzain etxera eraman zuten, epailearen esku jartzeko.
