Aurten ez dute San Juan surik piztuko Ondarroan
San Juan bezperako ekintzek zelako jendetza batzen duten ikusirik, ohiko ekintzak ez antolatzea erabaki du udalak. Gorozikako San Juan jaiak ere bertan behera geratu dira.
Egoera zein den ikusita, eta ekintzek gauez nolako jendetza mugitzen duten kontuan harturik, Ondarroako Udalak San Juan bezperan ekintzarik ez antolatzea erabaki du. Besteak beste, Artakakoek Itsas Aurren egin izan ohi den trapezio eta oihal ikuskizunak eta Artelanen eskutik Musika Plazan egin izan ohi den Akelarrea ez direla egingo jakitera eman dute. “Jaiak daukan berezitasuna ikusirik, eta beste leku batean eta beharrezko segurtasun neurriak beteta ekintzok burutzea ezinezkoa dela ikusirik, hartu du erabakia udalak”.
Aritza Aristondo Natxiondo Kultura zinegotziak esan du pena handiz hartu dutela erabakia, “herritarrentzat oso berezia” zen gaua izaten delako. “Adin tarte oso desberdinetako jendea batzen zen bi ekintzetan, batzuk zuzenean parte hartzen, eta besteak ikusle modura”.
Gorozikako San Juan jaiak ere ez direla ospatuko aditzera eman du auzoko jai batzordeak. Egoera zein den ikusirik, bertan behera utzi dituzte jaiak, “segurtasuna eta osasuna bermatze aldera”.
