Kanpai hotsen kexu dira Ziortza-Bolibarko herritar batzuk
Herrigunean dagoen Santo Tomas elizako kanpaiek 24 ordutan jotzen dutela diote. Apaizagaz hitz egiten saiatu badira ere, harek ez dietela kasurik ere egin esan dute. Apaizak, aldiz, HITZAri adierazi dio arazoa konpontzeko prest dagoela.
«Hamabost minututik behin jotzen dute, egunez zein gauez. Eta horrela urteko egun guztietan», diote herritar batzuek. Gutxienez, gauez ez jotzeko eskatu diote apaizari, azken horrek bai dauka kanpai hotsen maiztasuna aldatzeko eskumena. Apaizak, baina, ez dietela kasurik egin esan dute.
Egunean kanpai hotsa 100 bat aldiz entzuten dutela diote. «Astean 700 kanpai hots entzuten ditugu, hilean 2.800, eta urtean 33.200 aldiz. Gehiegizkoa iruditzen zaigu». Diotenez, ulertzen dute kanpaiak jotzeko ohiturari eustea, baina gutxienez gaueko kanpai hotsak kentzeko eskatzen dute. «Herritar batzuen deskantsuan ere eragiten dute kanpai hotsek, txarrerako, noski».
Apaizagaz ezinean. Arazoa erraz konpontzekoa dela uste badute ere, apaizak ez duela borondaterik erakusten diote. «Ez gaude elizaren kontra, ezta kanpaien kontra ere. Gaur egun guztiok dugu eskura mugikorra, erlojua… Ez dago beharrik gauean kanpaiak entzuten jarraitzeko. Ez dugu uste ezer arrarorik eskatzen gaudenik». HITZAk apaizagaz hitz egin du, eta harek esan du arazoa konpontzeko prest dagoela.
Beste herri eta auzo askotan ere arazo hori eduki dutela eta akordio batera ailegatu direla diote. «Guri, baina, ezinezkoa zaigu apaizagaz akordio batera heltzea».
Horrela, beraz, eta «ezintasuna» sentituta, sinadura bilketa bat ere egiten hasi dira. «Ez dugu nahi arazoa modu txarrean konpondu».
Dena dela, kanpai hotsen bolumena ere gehiegizkoa dela diote. «Egunez, plazan bazaude eta kanpaiak jotzen hasten badira, ezin duzu hitzik ere egin». Dezibelioen neurketa ere eginda daukate, eta Ziortza-Bolibarko herriguneko elizako kanpai hotsak 100 dezibelio gainditzen dituela diote. «Egunez 50 eta 65 dezibelio bitarteko hotsak onartzen dira, eta gauez 40 eta 55 artekoak». Ziortza-Bolibarren, baina, egunez zein gauez kanpai hotsek bolumen berdina daukatela diote.
Udala, laguntzeko prest. Herrigunean erromesentzako aterpetxe bat ere badago, eta hango arduraduna ere kaltetuetako bat dela diote. «Aterpetxean ostatu hartzen duten erromes guztiek esaten dute gauez ezin dutela ondo deskantsatu, 15 minuturik behin kanpai hotsak entzuten dituztelako». Aterpetxeko arduraduna gai horrekin «sufritzen» dagoela diote.
Udal ordezkariek esan dute jakin badakitela herritar batzuk gai horren inguruko sinadura bilketa egiten ari direla. «Momentuz, ezer ofizialik ez dakigu. Baina herritarrak diren heinean, arazoari irtenbidea emateko gure esku dagoena egiten saiatuko gara», dio Alberto Garro Ziortza-Bolibarko alkateak.
