Udalekuak antolatzeko aurre izen ematea zabaldu du Markina-Xemeingo Udalak
Izena emateko azken eguna ekainak 15 izango da. Udalekuek zalantzak eragin dituzte herritarren artean. Hori dela eta Olgetaneko hezitzaileek idatzi bat kaleratu dute egoera argitzeko.
Markina-Xemeingo Udalak udalekuak antolatzeko asmoa dauka, eta antolaketagaz hasteko aurre izen ematea zabaldu du. Jakitera eman dutenez, udalekuak uztailean egingo lirateke, ekainaren 29an hasita, eta 3 eta 9 urte arteko Markina-Xemeingo umeei zuzenduta egongo dira. Interesik egonez gero, gainera, abuztuan ere egiteko aukera egon daitekeela argitu dute, eta izen-ematea asteko egin ahalko da.
Parte hartu nahi dutenek udaletxean eman behar dute izena, Berton bulegoan. Izen-abizenak, umearen adina, kontaktua (telefonoa eta helbide elektronikoa) eta parte hartu nahi den astea edo asteak zehaztu behar dira. Izena emateko azken eguna ekainak 15 izango da.
Olgetan. Udalak antolatuko dituen udalekuek zalantzak eragin dituzte herritarren artean. Hori dela eta Olgetaneko hezitzaileek idatzi bat kaleratu dute egoera argitzeko. Olgetan udalekuak antolatu izan dira azken urteetan Markina-Xemeinen, baina aurten, COVID-19a dela eta, horrelako proiektu bat aurrera eramatea ezinezkoa dela ikusi dute.
Olgetan proiektuko hezitzaileek azaldu dutenez, 2019ko abenduan Olgetan proiektua aurkeztu zuten udalean. “Proiektu hori onartu egin zen, beraz, martxan hasi ginen udalekuak antolatzeko asmoz. 2020ko maiatzean, COVID-19a dela eta, momentu hartako egoera ikusita, bai udalak bai guk Olgetan bezala, udalekuak bertan behera geratzeko erabakia hartu genuen”.
Ekainaren hasieran, udalekuak egiteko aukera baimendu zuten, hainbat baldintza eta segurtasun neurri ekin. “Honen harira, udala gurekin harremanetan jarri zen gure asmoen berri izateko”, argitu dute.
Hala ere, Olgetaneko hezitzaileak egoera horretan proiektu hezitzailea aurrera eramatea ezinezkoa zela ikusi zuten, eta bestelako proiektu edo zerbitzu bat eskaintzeko prest egon direla azaldu dute. “Proiektu hori aurrera eramateko orduan zenbait zalantza izan ditugu eta udalarekin kontaktuan jarri gara hauek argitzeko eta proiektua batera lantzeko asmoz. Bilera horietan ez dira gure zalantzak argitu, eta udalak aditzera eman digu bere gain hartuko duela udako aisialdi eskaintza”.
Datorren urtera begira, orain arte bezala, “ilusioz” lanean jarraituko dutela azpimarratu dute, “aisialdi hezitzaile baten alde”.
