Hekimen: "Pandemiari aurre egiteko neurriek euskal komunikabideon bideragarritasuna baldintzatzen dute"
Euskal Hedabideen Elkarteak dio neurri batzuek euskal komunikabideon ohiko diru iturriei eragiten dietela. "Oraingoz diru laguntzetan murrizketa gutxi gertatu dira, baina sektorearen egonkortasuna bermatzeko funtsezkoa izango da erakunde guztiek euren konpromisoari eustea, eta ahal den heinean, areagotzea".
Euskal Komunikabideen Elkartea osatzen duten hedabideetako ordezkariak. Argazkia: Hekimen Hekimen Euskal Hedabideen Elkarteak esan du pandemiaren hedapena geldiarazteko ezohiko neurriak zuzenean eragiten ari direla euskal komunikabideon egitasmoetan. Konfinamendu garaian, elkarteko hedabideen webguneetako erabiltzaileak nabarmen gehitu dira, baina publizitateko diru iturrietan %40tik gorako murrizketak egon dira. Harpidetzetan jaitsiera txikia izan bada ere, etorkizunari “kezkaz” begiratzen zaiola esan dute. “Diru laguntza publikoekin ere antzeko zerbait gertatzen da: oraingoz murrizketa gutxi gertatu diren arren, ikusteko dago etorkizunean zer gertatuko den. Eremu horretan, funtsezkoa izango da erakundeek konpromisoari eustea sektorearen egonkortasuna bermatzeko; eta, ahal den heinean, areagotzea”.
Aurreko krisiaildi ekonomikotik “erabat osatu gabe” eta hedabideen mundua bizitzen ari den eredu aldaketaren erdian, sektorea egonkortzeko bidean lehen pausoak ematen ari zenean, krisialdi berri bat pairatzen hasi dela azaldu dute. Dena dela, eta komunikabideok lehen mailako zerbitzu garen heinean, lanean jarraitzeko ahal den guztia egin dela esan dute. “Herritarrei pandemiaren inguruko informazio zuzen eta eguneratua helarazteko ahal izan dugun guztia egin dugu”.
Euskal hedabideon garrantzia “inoiz baino ageriago” geratu dela esan dute. “Horren parean, baina, pandemiari aurre egiteko hartzen ari diren neurriak daude. Neurri horiek komunikabideon bideragarritasuna baldintzatzen dute”.
Pandemiak elkarteko komunikabideei nola eragin dien jakiteko, Hekimenek bazkideen artean inkesta bat zabaldu du, eta emaitzak gazi-gozoak izan direla diote: “Hasteko, bazkide guztiek hartu dituzte pandemiari aurre egiteko oinarrizko neurriak, eta, ondorioz, ehunka lagunek osatutako sarean bi COVID-19 kasu baino ez dira zenbatu”. Hedabideetako langileak, moldaketa batzuk eginda “baldintza zailetan” ere ekoizpenari eutsi nahi izatea azpimarratu dute. “Egindako ahaleginari herritarrek emandako erantzuna paregabea izan da. Izan ere, elkarteko komunikabideen webguneetan iazko martxoan baino 500.000 erabiltzaile gehiago zenbatu dira”.
Egitasmo asko (%71) bertan behera geratu direla ere mahairatu dute. “Etorkizunean zenbait egitasmo berrartzeko aukera egon liteke, baina, ziurrenik, gehienak ez dira berreskuratuko”.
Lantaldeetan ere murrizketa gutxi egon direla diote. “Lehen asteetan zenbait hedabidek aldi baterako murrizketak abian jarri zituzten, baina orokorrean ez da egon behin betiko kontratu eteterik. Etorkizunean ere ahal dugun guztia egingo dugu egungo lantaldeei eusteko, eta espero dugu herritarrek zein erakundeek ere, euren babesa mantenduz, ahal duten guztia egingo dutela aurreko krisialdietako egoera errepikatu ez dadin”.
Hekimen osatzen duten hedabideek garatzen dituzten egitasmo asko (%71) bertan behera geratu direla ere mahairatu dute. “Etorkizunean zenbait egitasmo berrartzeko aukera egon liteke, baina, ziurrenik, gehienak ez dira berreskuratuko”.
Horren guztiaren aurrean, orain arte bezala lanean jarraitzeko konpromisoa berretsi du elkarteak. “Lan asko eta ahalegin handia egin da gauden tokiraino iristeko, eta hasitako bidea emankorra izaten ari da. Jarrai dezagun elkarlanean bidea egiten, eta gaindi ditzagun etor daitezkeen traba eta oztopoak elkarrekin, guztiontzako errazago izango baita eta herritarrek eskertu egingo digute”
