Kukaña inguruan balizak jartzen hasi da Ondarroako Udala
Bertan ibiltzen diren neska-mutil gazteen segurtasuna bermatzea dute helburu. Gaur hasi dira balizak jartzen.
Langileak, gaur eguerdian, Ondarroako kukaña inguruak buxekin balizatzen Kukaña azpiko ur eremua balizatuko du Ondarroako Udalak bertan ibiltzen diren gazteen segurtasuna bermatzeko. Azaldu dutenez, iaz hartu zuen erabakia, eta aurten gauzatu egingo da, Portu Zuzendaritzarekin lortutako akordioari esker. Gaur [ekainak 18] eguerdian hasi dira balizak jartzen txalupa baten laguntzagaz; urpekari bat ere ibili da buiak jartzen.
Buia eta kortxoen bidez laukizuzen formako esparrua zehaztuko dute kukañaren azpian: «Eremu bat markatuko dugu, eta horren barruan ezingo da ontzirik sartu. Uste dugu oso garrantzitsua dela gazteen segurtasunerako», azaldu du Zunbeltz Bedialauneta Ibaibarriaga Ondarroako alkateak.
Ondarroan bainatzeko betiko gune naturalak babestea «oso garrantzitsua» dela ere azpimarratu du alkateak, eta nahiz eta errekan beste elementu batzuk ere egon, gazteen aisialdiko betiko espazioak mantentzea berebizikoa dela. «Udan herrian ondo pasatzeko espazio berria sortzen da inguru horretan, eta denon artean mantendu behar dugu. Txoko berezia da guztiontzat; zer esanik ez, gazteentzat».
Nasapuntako azpian balizekin zehaztutako esparrua. Irudia: Ondarroako Udala
Kukañaren erabilera egokia izan dadin arauak bete behar direla gogora ekarri du alkateak: «Gazteei kukaña ondo erabiltzen irakatsi behar diegu: kukaña gainean bi lagun baino gehiago ez dira egon behar; ez kulunkatu; eta igotzen hasi baino lehen, ziurtatu azpian ez dagoela inor».
Segurtasuna helburu, oinezkoentzako eremu bihurtu dute aste honetan kukaña ingurua ere, eta ezin da bertan aparkatu.
