Zapato Azulean jairik ez egitea eskatu du Ondarroako Udalak
Herritarrei zein kanpotik etortzeko asmoa dutenei Ondarroara ez etortzeko eta jairik ez egiteko deia egin diete udal ordezkariek, jaiaren antolatzaileek hartutako erabakia errespetatuz.
Radixu Irratiak aurten Zapato Azulik ez antolatzea erabaki du, COVID-19ak eragindako egoera dela eta. Hori dela eta, herritarrei zein kanpotik etortzeko asmoa dutenei ekainaren 27an Ondarroara ez etortzeko eta jairik ez egiteko deia egin diete Ondarroako udal ordezkariek. “Udaletik uste dugu antolatzaileen erabakia guztiok errespeta behar dugun kontua dela, are gehiago COVID-19a dela -eta hartu den erabakia izanik. Espero dugu zentzuz jokatzea denok. Orain arte egindako esfortzu guztia ezin da ezerezean geratu antolatzaileek bertan behera utzita duten jai bat ospatu nahi dutelako batzuek. Zentzuz eta arduraz jokatu behar dugu. Hilabete gogorrak izan dira, orain dena hankaz gora botatzeko”, esan du Zunbeltz Bedialauneta Ibaibarriaga alkateak.
Bedialaunetak gaineratu dutenez, “arduraz” jokatzeko momentua da, eta horrela egiteko eskatu die herritarrei, tabernariei eta kanpotik etorri daitezkeenei. “Asko gozatzen dugu Zapato Azulean, baina orain ez da momentua. Radixu Irratiak guztion hobe beharrez hartu erabakia, eta guri hori errespetatzea dagokigu. Gero ez du balioko damutzeak”. Alkateak garbi laga nahi izan du bat datorrela herriko irrati libreak hartutako erabakiagaz. “Zapatu Azulak, besteak beste, jende pilaketa du oinarri, eta ez gaude eredu horretako jaialdi jendetsurik ospatzeko une egokian”.
Udalak, bide beretik, debekatu egin die ostalaritzako lokalei halako jai egunetan eduki ohi duten ordutegi berezia aplikatzea. “Jai egunetarako ordutegi berezia edukitzen dute tabernek, bi ordu gehiago zabalik edukitzeko. Urte hasieratik dekretu hori martxan badago ere, 2020/0535 dekretuagaz bertan behera utzi dugu, eta tabernek ohiko ordutegian itxi beharko dute”. Terrazek, esaterako, 23:00ak arte egon ahalko dira zabalik. Horrez gain, egun horretan Udaltzaingoak gaueko txanda ere egingo duela iragarri dute. “Nahiz eta jairik ez egon, hori mantendu egingo da”.
