Positibo berri bat erregistratu dute Lekeition
PCR bidez 8 positibo baieztatu zituzten atzo [ekainak 22]: 4 Gipuzkoan, 3 Bizkaian (bat Lekeition) eta 1 Araban. Guztira, pandemia hasi zenetik, Lea-Artibain eta Mutrikun 104 positibo erregistratu dira. Hildakoei dagokienez, eskualdean 7 herritar hil dira COVID-19aren ondorioz.
Eusko Jaurlaritzak gaurko txostenean jaso duenez, atzo [ekainak 22] Lekeition COVID-19agaz kutsatutako positibo bat antzeman zuten, PCR bidez. Maiatzaren 23tik Lea-Artibain eta Mutrikun positibo berririk antzeman barik zeuden. Guztira, pandemia hasi zenetik 104 positibo erregistratu dituzte eskualdean:
- Lekeitio: 26 positibo
- Ondarroa: 24 positibo
- Markina-Xemein: 21 positibo
- Mutriku: 14 positibo
- Berriatua: 6 positibo
- Etxebarria: 4 positibo
- Mendexa: 4 positibo
- Aulesti: 2 positibo
- Ispaster: 1 positibo
- Gizaburuaga: 1 positibo
- Ziortza-Bolibar: 1 positibo
Bestalde, Osasun Sailak emandako datuen arabera, pandemia hasi zenetik, COVID-19agatik 7 herritar hil dira Lea-Artibai eta Mutrikuko osasun eremuetan: 3 Ondarroan, 3 Markina-Xemeinen eta 1 Lekeition.
“Atzo antzemandako zortzi kasu horietatik, bostek harremana daukate aurreko egunetan antzemandako positibo batzuekin, eta isolatuta egon dira”, azaldu du Nekane Murgak. Azken aste eta egunotako fokuak “kontrolpean” dituztela eta “aldaketarik ez dagoela” esan du.
Azkenaldian positibo ematen ari direnen batez besteko adina “jaisten” doala baieztatu du, eta esaterako, atzoko bi positibo adin txikikoak direla zehaztu du: “Azkenaldiko positiboetako batzuk gazteak eta umeak diraUrtebete baino gutxiago duten adingabeak identifikatzen ari gara, eta horrek atentzioa eman digu. Umeek, oro har, ez dute gaixotasunaren sintoma larririk izaten, baina kasuak egon daitezke. Beraz, gure haurrak babestu behar ditugu”.
