Hondartzak zaintzeko eskatu du Eguzkik
Hondartzak garbi mantentzeko kanpaina Lea-Artibai, Mutriku eta Busturialdeko hondartzetara zabalduko dute datozen egunotan.
Ondarroako Arrigorri hondartzan ipinitako kartela. Argazkia: Eguzki Uda denboraldia hasteagaz batera kanpaina berria jarri du abian Eguzki talde ekologistak. Hondartzetan sortzen den zabor kopuru handiagaz kezkatuta, bertaratzen direnei hondartzak garbi mantentzeko eta arreta berezia edukitzeko eskatu diete. Nabarmendu dutenez, kanpaina ez da berria. “Lantzean-lantzean antzerako kanpainak egin izan ohi ditugu. Eta egoera zein den ikusita, antzerako zerbait errepikatu beharra zegoela iruditu zaigu. Aurten, gainera, egoera kezkagarriagoa dela iruditzen zaigu. Hondartzetan gero-eta zikinkeria gehiago agertzen da, eta koronabirusaren kontuagaz, eskularruak eta maskarak nonahi agertzen ari dira”.
Ondarroako Arrigorri hondartza inguruetan ipini dituzten karteletan, esaterako, honakoa dioten kartelak itsatsi dituzte: Ez dizugu hondartza garbitzeko eskatzen, soilik ez zikintzeko. Modu horretara, zentzuz jokatzeko gogorarazi diete hondartzetako erabiltzaileei. “Badirudi hondartzak bakarrik garbitzen direla. Baina hori garbi mantentzeko ahalegina egiten duten langileak daude horren atzean. Denon ardura da hondartzak garbi mantentzea; zentzuz jokatu dezagun”.
Kanpainako lehen kartelak Ondarroan ipini badituzte ere, eragina era zabalagoan lortu nahi dutela iragarri dute. Modu horretara, hurrengo egunotan Lea-Artibai, Mutriku eta Busturialdeko hondartzetan ere antzerako kartelak ipiniko dituztela azaldu dute. “Atzo ipini genituen lehen kartelak Ondarroan, eta datozen egunotan, gure ahalmenaren arabera, han-hemenka gehiago ipintzen joango gara”.
