Markina-Xemeingo Master Series lortzeko borroka hasiko da asteburuan
Barikuan, uztailaren 10ean eta uztailaren 16an kanporaketak jokatuko dira; finala uztailaren 19an erabakiko da. Punta puntako pilotariak batuko ditu norgehiagokak.
Markina-Xemeingo 2019ko Master Series. Olharan-Laduche, Aldazabal-Hormaetxea final laurdenetako partidua. Argazkia: Josu Arrate 'Txorixe' Markina-Xemeingo Master Series txapelketa hasiko da jokoan barikuan [uztailak 3] Uni frontoian. Bi kategoriatan banatuko da txapelketa, eta punta puntako pilotariak batuko ditu. Besteak beste Goikoetxea, Etcheto, Hormaetxea, Lopez, Beaskoetxea, Lekerika, Erkiaga, Aldazabal, Barandika eta Ibarluzea ikusteko aukera eskainiko die txapelketak zesta-punta zaleei. Uztailaren 10ean eta uztailaren 16an jokatuko dira hurrengo partiduak, eta finala uztailaren 19an izango da.
15 tantoko bi set jokatuko dituzte barikuko kanporaketan, eta 19:00etan ekingo diote lehen partiduari. Lehen partida Goitia (Markina-Xemein)-Aldazabal (Berriatua) eta Goixerri-Manzi mutrikuarren artekoa izango da; bigarrena, berriz, Aaron (Gasteiz)-Salegi (Markina-Xemein) eta Berriatuko eskolako Antxon etxebarritarra eta Zabala (Markina-Xemein) bikoteen artekoa.
Barikuko lehen partiduko irabazleek uztailaren 10ean jokatuko den kanporaketarako txartela eskuratuko dute, eta Barandika (Gernika) eta Ibarluzea (Markina-Xemein) bikoteagaz neurtu beharko dituzte indarrak. Beste partida, lehen mailakoa, Beaskoetxea-Lekerika (Gernika) eta Erkiaga (Ispaster)-Ibon Aldazabal (Berriatua) bikoteen artekoa izango da. 22:00etan ekingo diote lehen partiduari.
Karmen Egunean [uztailak 16], lehenengo, barikuko [uztailak 3] bigarren partiduko irabazleak eta Arbe eta Mandiola Markina-Xemeingo bikotea aurkituko dira aurrez aurre. Ondoren, Goikoetxea (Zumaia)-Etcheto (Bidart) eta Hormaetxea (Bermeo)-Lopez ( Zumaia) neurtuko dira. Karmen Eguneko funtzioa 18:00etan hasiko da.
Uztailaren 19an erabakiko dira 2020ko Markina-Xemeingo Master Series Txapelketako kategoria bietako bikote irabazleak. Uztailaren 10ean eta 16an irabazten duten bikoteen artean egongo da lehen mailako eta bigarren mailako irabazlea. Lehenengo finala 18:00etan hasiko da, eta ostean izango da lehen mailakoa.
Karmenetako txapelketa. Markina-Xemeingo Zesta-Punta Eskolak urtero antolatzen duen Karmen Saria txapelketako bigarren jardunaldia ere jokatuko da asteburuan. Partidak egongo dira barikuan [uztailak 3] 16:45ean, zapatuan [uztailak 4] 11:30ean eta domekan [uztailak 5] 11:00etan.
