Tarragonako Psicurt jaialdirako aukeratu dute 'Mi pequeño gran samurai'
Urriaren 8tik 11ra Tarragonan egingo jaialdirako aukeratu dituzten 40 zinten artean dago Arantza Ibarra ondarrutarrak zuzendako zinta; sail ofizialean lehiatuko du.
Arantza Ibarra Basañez ondarrutarrak zuzendutako Mi pequeño gran samurai nazioarteko beste film laburren jaialdi baterako aukeratu dute. Urriaren 8tik 11ra Tarragonan egingo den Osasun mentalari buruzko V. Psicurt film laburren jaialdirako aukeratu dituzten 40 zinten artean dagoela jakitera eman du zuzendari ondarrutarrak. Hain zuzen ere, sail ofizialean lehiatuko du Ekai Lersundiri buruzko film labur dokumentalak.
Ibarrak agertu duenez, martitzenean [uztailak 21] eduki zuten aukeraketaren berri. Mi pequeño gran samurai beste jaialdi baterako aukeratu dutela jakin ostean, pozik dagoela nabarmendu du. “Bertan parte hartzeak ilusio berezia egiten dit. Egia esan, osasun mentalari buruzko jaialdi batean parte hartzea aberasgarria dela iruditzen zait. Zinta ez da ari bakarrik LGTBI+ mugimenduko jaialdietan bakarrik parte hartzen, beste gai batzuk hartzen dituzten jaialdietan ere ari da mugitzen, eta hori oso pozgarria da guretzat. Modu horretara, beste era bateko jendeak ere gure lana ikusi eta zabaltzeko dugun mezua jasotzeko aukera edukiko du; alde horretatik oso positiboa da”.
Zuzendari ondarrutarrak iragarri duenez, gainera, nazioarteko beste jaialdi batean parte hartzeko ere aukeratu dute Mi pequeño gran samurai. “Jaialdiak laster zabalduko du albistea, eta hori publiko egin arte zain gaude. Publiko egiten denean horren berri ere emango dugu”.
