Ustez galduta zegoen ondarrutarra senideekin jarri da harremanetan
Ondarroako Udalak jakinarazi duenez, koordinazio arduradunak Ondarroako Udaltzaingoari jakinarazi berri dio ustez galduta zegoen gizona bere senideekin jarri dela harremanetan. HITZAk jakin ahal izan duenez, herritarrak berak "ondo dagoela" esan dio senide bati.
Herritarrak, Gurutze Gorriko, DYAko eta larrialdi zerbitzuetako kideak, Saturrarango aparkalekuan ezarritako gunean. Gaur goizean hasi dira 79 urteko ondarrutar baten bila Ondarroan eta inguruko herrietan. Herrizaingo Sailak jakitera eman duenez, desagertuaren senide batek goizaldean salatu du desagerpena, eta harrezkero larrialdi zerbitzuak gizonaren bila ibili dira. 18:30ak aldera, baina, Ondarroako Udalak sare sozialen bidez jakinarazi du bilaketa lanen koordinazio arduradunak Ondarroako Udaltzaingoari jakinarazi diola ustez galduta zegoen gizona bere senideekin harremanetan jarri dela. HITZAk jakin ahal izan duenez, herritarrak berak “ondo dagoela” esan dio senide bati. Ondorioz, bilaketa lanak bertan behera utzi dituzte.
Azaldu dutenez, gizonezkoak martitzen [uztailak 21] arratsaldetik zeraman desagertuta; “ez zen itzuli etxera”. Saturraran eta Errenteria auzo artean egiten duen paseoa ematera atera zenetik falta zen herritarra, eta senideek abisua eman bazuten ere, goizaldera arte ezin izan zuten salaketa ipini.
Besteak beste, Ertzaintzaren erreskate unitatea, Gurutze Gorria, DYA, suhiltzaileak, Euskadiko eta Ertzaintzaren salbamendu taldeko txakurrak, Ondarroako Udaltzaingoa ibili dira bailaketa lanetan, itsasoz, lurrez zein airez. 09:15ean bilaketa areagotu egin dute. Saturrarango hondartzako parean dagoen aparkalekuan bilaketarako operazio basea ezarri dute, eta bilaketa taldeak handik ibili dira antolatzen. Bilaketa lanetan laguntzeko herritarren laguntza ere eskatu dute. Larrialdi zerbitzuek azaldu dutenez, boluntario asko hurreratu dira. “Eskertzekoa da horien laguntza”.
Bilaketa lanak desagertua nondik ibiltzen zen eta desagertu zen momentuan nora joan zen kontuan hartuta egin dituztela esan du Ibone Elorriaga Eusko Jaurlaritzako emergertzia teknikariak. “Inguruetatik ibili gara bilaketa egiten, baina kostaldean gaudenez, harkaitzetara ere zabaldu dugu bilaketa. Horretarako itsasontzien eta helikopteroaren laguntza ere eduki dugu. Denetara, 100 bat lagun inguru ibili gara”.
Lurrez bilaketa egiten ari ziren boluntarioak hamar lagun inguruko talde txikietan batu eta segmentuka inguruak arakatzen ibili dira. “Talde bakoitzean arduradun bat izendatu dugu, eta horiei zonalde txiki bat arakatzeko eskatu diegu. Inguruak poliki-poliki eta kontuz handiz arakatzeko eskatu diegu, desagertua han ez zegoela ziurtatzeko”. Larrialdi zerbitzuetako bilaketa talde espezializatuak, ostera, gune zailagoetan ibili dira bilaketa lanak egiten.
Familiak eskerrak eman nahi dizkie bilaketetan parte hartu duten herritar guztiei: «Eskerrik asko bihotz-bihotzez».
Gurutze Gorriko erreskate taldea bilaketa lanetarako antolatzen, Saturrararen. Argazkia: Cruz Roja Twitter
Ertzaintzaren itsasoko unitatea, bilaketa lanetan parte hartzen. Argazkia: UVR Ertzaintza Twitter
