Naia Arantzamendiren 'Sutan' lana, Zineako I. Film Laburren Gidoi Lehiaketako irabazle
Donostiako historiako gertaera lazgarri bat oinarrian hartuta idatzi du gidoia ondarrutarrak. Epaimahaikideek lana oso bisuala, iradokitzailea eta genero ikuspuntutik landua dagoela azpimarratu dute.
Zineako I. Film Laburren Gidoi Lehiaketako irabazleak jakitera eman dituzte egunotan eta epaimahaikideek Naia Arantzamendi ondarrutarrak aurkeztutako Sutan lana izendatu dute irabazle. Ondarrutarrak 800 euroko ordainsaria jasoko du, eta, horrez gain, lehiaketaren oinarrietan adierazi modura, “gidoiaren filmaketarako finantzaketa zein giza baliabideak bilatzeko aukera eskainiko dio Zinea hedabideak”.
Izaskun Arandia ekoizleak, Esther Cabero Euskadiko Filmategiko kideak eta Ekain Albite zinemagileak izan dute proiektu irabazlea adosteko ardura. Lehiaketara aurkeztu diren 37 lanetatik aho batez erabaki dute Naia Arantzamendik aurkeztutako Sutan gidoia irabazle izendatzea. “Oso lan bisuala da, iradokitzailea, eta genero ikuspuntutik ere landua dagoena”.
Donostiako historiako gertaera lazgarri bat oinarrian hartuta, istorio unibertsal bat osatu du sortzaile ondarrutarrak. Epaimahaikideek berbetan istorio “oso esportagarria” dela azpimarratu dute; “duen atmosfera fantasmagorikoa tarteko, leku interesgarrietatik eramaten zaitu, eta engantxatu egiten du”. Hizkuntzaren erabilera baliatuz, gainera, lana testuinguruan jartzeko Arantzamendik izan duen abilezia eta sentsibilitatea nabarmendu dute epaimahaikideek.
Epaimahaikideek, bestalde, lehiaketara aurkeztu diren gidoigileen esfortzua eta ekina eskertu nahi izan dituzte. Era guztietako proiektuak jaso dituztela azaldu dute. “Benetako gertakarietan oinarritutakoak, gai sozialak jorratzen dituztenak, gizartean puri-purian dauden auziei buruzko hausnarketak… eta generoari dagokionez ere, gizonezko zein emakumezkoek protagonismo partekatua dute”.
