Ontzat jo du atxiloketen albistea Zaldibar Argitu plataformak
Jardun publikoen aldetik ez dela autokritikarik egin esan dute. Abuztuaren 3an Legebiltzar aurrean elkarretaratzean batzeko deia egin dute.
Zaldibarko zabortegiko jabearen eta kudeatzailearen atxiloketen aurrean «poza» eta «kezka» adierazi dituzte Zaldibar Argitu plataformakoek. Gaia epaitegietan egonik, zer edo zer etorri zitekeenaren susmoa bazeukala azaldu dute. Gainera, azken aldian, pixkanaka-pixkanaka, erru guztia Verter Recycling 2002 SM enpresako nagusiei botatzen ari zirela ikusten zutela esan dute.
“Laster 6 hilabete beteko dira, eta berandu etorri den arren guretzat berri ona izan da. Erantzukizunak argitzeko bidean urratsa bat eman dela uste dugu eta mugimendu hau beharrezkoa zela iruditzen zaigu”.
Baina, bestalde, kezkatuta ere badaude. “Verter enpresaren auzian erantzukizun pribatuak eta publikoak daudela nabarmena da, txanpon beraren bi aldeak baitira. Erantzukizun publiko-politikoei dagokionez ez da ezer egin, eta zentzu horretan urratsak eman behar dira higiene demokratikoagatik”.
Halaber, kezka eragiten dietela azpimarratu dute bai eta ere, «ezelako azalpenik eman barik eta inongo epaitegian ezer azaldu barik», Iñaki Arriola ingurumen sailburua berriro parlamentu berriko kidea izango dela ikusteak. «Ematen du hiru atxiloketa horregaz dena amaitutzat emango dela, baina oraindik gauza asko daude argitzeko, tartean desagertutako langileen egoera zein den eta ingurumen aldetik ere ze egoera dagoen. Argi dago ingurumen sailak afera guzti honetan paper garrantzitsua jokatzen zuela, eta ez zituzten bere eginbeharrak modu egokian bete».
Hileroko dinamikagaz jarraituaz, hilabete hasieretan, hondamendiaren datagaz lotuta, ekimenak egiten jarraituko du plataformak, eta beraz, abuztu hasierarako ere ari dira ekimenak prestatzen. “Guk martxan jarraituko dugu. Honek luzerako joko du eta luzera begirako planteamendua daukagu. Gertaerei adi egongo gara uneoro».
Hilabeteko data horiez gain, laster helduko da bai eta ere luizia gertatu zeneko 200. eguna. 100. egunean ere egin ziren ekimen batzuk eta 200. egunera begira ere antolatuko dituzte formatu ezberdinetako ekimenak. «Nahiz eta data aldrebesak izan garrantzitsua da guretzako presente egotea».
Plataformak antolatutako hurrengo ekimenak hauek izango dira:
–Abuztuak 3: Elkarretaratzea legebiltzar aurrean. 09:30ean. Legebiltzarra eratzeko osoko bilkura egingo da.
-Abuztuak 6: Luizia gertatu zela 6 hilabete betetzen dira, eta elkarretaratzea egingo da Markina-Xemeinen, beste herri batzuekin batera.
