AHTra bideratutako diru publikoa "oinarrizko beharretara” bideratzeko eskatzen duen mozioa onartu du Ondarroako Udalak
EH Bilduk alde bozkatu du, eta EAJk kontra. Koalizio abertzaleko zinegotziak esan du AHT "adostasunik gabeko proiektu handi bat" dela. EAJko bozeramaileak, ostera, AHT proiektu estrategikoa dela esan du.
Abiadura Handiko Trenaren obrak, Donostian. Mozioa Orain Ardura ekimen herritarrak aurkeztu zuen Ondarroako Udalean, eta uztailaren 30eko ohiko udalbatzan eztabaidatu zela esan dute. EH Bilduk mozioaren aldeko bozka eman zuen, eta EAJk, ostera, kontrakoa. EH Bilduko zinegotzi batek udalbatzara ezin izan zuenez joan, alkatearen kalitatezko botoak hautsi zuen berdinketa, eta mozio onartu egin zen.
Pedro Lasarte Iparragirre EH Bilduko zinegotziak esan zuen Abiadura Handiko Trenari buruzko eztabaida oraindik ere gizartean egon badagoela, “adostasunik gabeko proiektu handi bat” delako: “diru kostu handia, trenaren funtzioa, bideragarritasuna eta behar ote den edo ez, proiektuaren hasierako aurrekontuak izugarri handitzea, naturan eta ingurumenean eragindako kaltea, baserri desjabetzeak…”. Eztabaida horri konponbidea bilatzeko eta AHT bezalako proiektuei buruz herritarrek erabaki ahal izateko, prozesu parte hartzaileen garrantzia azpimarratu zuen Lasartek.
Udalak krisiaren ondorioak arintzen laguntzeko oinarrizko gizarte-zerbitzuetarako eta krisiak eragindako sektoreentzako laguntzetarako diru sailak handitzeko ere eskatu die Jaurlaritzari eta Espainiako Gobernuari
Bestalde, Maria Dolores Etxano Varela Ondarroako EAJren bozeramaileak kontrako botoa ematea arrazoitu zuen. “AHTaren eskumena Espainiako Gobernuarena da, eta %90a exekutatuta dago. Gastu soziala mantentzearen aldeko apustua egin behar da, gutxieneko inbertsio publikoak mantenduz. Aurreko krisialdian inbertsio publikoa murriztu egin zen, eta maila berreskuratzea ez da erraza izan. AHT estrategikoa da eta gainera Europako diru laguntzak daude inbertsioari aurre egiteko”.
Ondarroako Udalak mozioa onartu duela jakinarazi dio Eusko Jaurlaritzari eta Espainiako Gobernuari. Horrez gain, krisiaren ondorioak arintzen laguntzeko oinarrizko gizarte-zerbitzuetarako eta krisiak eragindako sektoreentzako laguntzetarako diru sailak handitzeko ere eskatu die. “Horretarako, Abiadura Handiko Trenaren obretarako eta proiektuetarako erabiltzen diren funts publikoak erabil ditzatela eskatu diegu. Hala, obra eta proiektu horiek geldiarazi egin beharko lirateke”.
