Isuntza eta Ondarroa ez dira Kontxako banderaren lehian egongo
Emakumeen sailkapen estropadan Ondarroa zortzigarren sailkatu da, eta Isuntza hamargarren. Orio izan da azkarrena, eta zazpi talde gipuzkoarrek lortu dute datozen bi asteburuetan bandera lehiatzeko txartela.
Arraroa. Zalerik barik, eta tentsioa uretan bakarrik. Horrelakoa izan da gaur [irailak 2] arratsaldeko emakumezkoen Kontxako sailkatze estropada. Hamahiru talde uretan, baina zazpi txartel zeuden jokoan, eta Ondarroak eta Isuntzak ez dute lortu datozen bi domeketako lehian sartzea. Orio Euskotren Ligako txapeldunak eta bandera eskuratzeko faborito nagusiak ez du hutsik egin. Itsas milia eta erdiko lana 11:08.82 denboran eginda azkarrena izan da. Ondarroak 11:43.96 denbora egin du, eta Isuntzak 11:58.12.
Hala, zortzi talde gipuzkoarren artean erabakiko da aurtengo bandera: Orio, Tolosaldea, Donostia Arraun Lagunak, Zumaia, Hondarribia, San Juan, Hibaika eta Donostiarra.
Ondarroa Bizkaiko txapelduna ETE Ligako azken jardunaldiko bandera irabazita joan da Donostiara, eta hark ireki du sailkatze estropada. Sei talde egon dira lehen txandan, eta ondarrutarrak izan dira multzoko onenak. Isuntza, berriz, multzoko hirugarrena izan da.
Ondarroa AEKo arraunlariak Donostian, gaur arratsaldean. Argazkia: Ondarroa Arraun Elkartea.
Isuntzakoak, Donostian. Argazkia: Isuntza
Nagore Osoro ondarrutarren patroi eta entrenatzaileak zortzigarren egitea ere ez dela gutxi esan du. Donostiara ilusioz joan direla eta, banderaren lehiarako txartelik ez lortzeagatik etxera penagaz bueltatuko direla aitortu du. Arraunlariek egindako lana txalotu du: “Agian ez da izan gure estropadarik onena, baina txarrena ere ez. Gaurko egunean hona aukerekin etortzea ere ez da gutxi, eta orain arteko bideagaz akordatu behar gara, hau dena ez da musutruk izan eta. Itzelezko denboraldia izan da; ezin diet gehiago eskatu neskei”.
Euren maila emateko gai izan direla azpimarratu du. Badian gozatu dutela, baina kanpoaldea arraunerako “oso deseroro” zegoela zehaztu du, itsasoa “oso nahasia eta zikin” zegoela. Itsaso eta olatu handirik ez dute eduki arratsaldean, baina ipar ekialdeko haizeak arraunlarien lana oztopatu du.
Tolosaldea izan da estropadako protagonistetako bat. ETE ligako txapeldunak ezustekoa eman du. Bera izan da ziabogan azkarrena, Orioren erreferentzia bost ehunenetan hobetuta. Oriotarrek poparian lan bikaina eginda, zortzi segundo atera dizkiete Tolosaldekoei.
SAILKAPENA:
- 1.- Orio: 11:08.82
- 2.- Tolosaldea: 11:17.64 (+8.82)
- 3.- Donostia Arraun Lagunak: 11:21.08 (+12.26)
- 4.- Zumaia: 11:28.16 (+19.34)
- 5.- Hondarribia: 11:28.72 (+19.90)
- 6.- San Juan: 11:33.64 (+24.82)
- 7.- Hibaika: 11:37.96 (+29.14)
- 8.- Ondarroa: 11:43.96 (+35.14)
- 9.- Cabo: 11:47.92 (+39.10)
- 10.- Isuntza: 11:58.12 (+49.30)
- 11.- Lutxana: 11:58.74 (+49.92)
- 12.- Tiran: 12:02.02 (+53.20)
- 13.- Chapela: 12:19.30 (+1:10.48)
