Hezkuntzan grebara joko dute irailaren 15ean
Sindikatu guztiek egingo dute deialdia elkarrekin, eta hezkuntza osoari eragingo dio: sare publikoari eta itunpekoari. Salatu dute eskasak direla Eusko Jaurlaritzak hartutako neurriak, eta ez dituela langileak aintzat hartu. Goizean agerraldi bat egitekoa dute ordezkaritza duten bost sindikatuek, eta orduan emango dituzte xehetasunak.
Sindikatuetako ordezkariak, greba deitzeko agerraldian. Argazkia: ELA Ikasturtea hasi eta astebetera, irailaren 15ean, grebara joko dute Arabako, Bizkaiko eta Gipuzkoako ikastetxeetan. BERRIAk baieztatu duenez, elkarrekin grebara deitzekoak dira ordezkaritza duten bost sindikatuak: ELA, LAB, Steilas, CCOO eta UGT. Goizean agerraldi bat egitekoa dute, eta orduan emango dituzte xehetasunak. Baina ziurra da greba deialdia jarriko dutela mahai gainean, eta hezkuntza osoari eragingo diola: sare publikoari eta itunpekoari.
Azken asteetan ezinegon handia agertu dute sindikatuek Eusko Jaurlaritzaren neurriekin. Batetik, salatu dute langileak kontuan hartu gabe aritu dela ikasturte hasiera prestatzen; besteak beste, ohartarazi dute Hezkuntza Sailak ez duela bilerarik egin sindikatuekin. Bestetik, hartutako neurriak ere ahultzat jo dituzte. Jaurlaritzak joan den astean iragarri zuen mila irakasle gehiago hartuko dituela ratio handienak dituzten eskoletarako, gela bakoitzeko ikasle kopurua jaisteko, baina sindikatuek aho batez salatu zuten neurri hori ez zela nahikoa, baliabide gehiago beharko dituztela.
Horiek dira, hortaz, grebara jotzeko motiboak: batetik, baliabide gehiago eskatzea, eta, bestetik, eskolarako itzulera langileekin ere adostea.
Arabako, Bizkaiko eta Gipuzkoako ikastetxeak datorren astelehenean[[irailak 7] dira ikasturteari ekitekoak; irakasleak jadanik lanean ari dira, hala ere. Hezkuntza Sailak, nolanahi ere, atzeratu egin du maila batzuetako ikasleen hasiera: DBHko hirugarren eta laugarren mailako ikasleak irailaren 15ean hasiko lirateke, baita Batxilergokoak ere —hain justu, egun horretarako antolatu dute greba—; Lanbide Heziketako ikasleen itzulera mailakatuagoa izango da, iraileko bigarren hamabostaldian.
