Isuntzak, Ondarroak eta Mutrikuk ez dute lortu Kontxako bandera lehiatzeko txartelik
Emakumezkoetan gertatu modura, Ondarroa zortzigarren geratu da, eta Isuntza hamargarren; Mutriku hogeigarren geratu da. Zierbena izan da denborarik onena egin duena.
Argazkia: Bermeo Arraun Argazkiak Sailkapena eta denbora:
- Zierbena 19.45,18
- Orio 19.49,06
- Hondarribia 19.49,94
- Santurtzi 19.58,24
- Urdaibai 19.59,56
- Cabo 20.06,64
- Zarautz 20.16,93
- Ondarroa 20.19,26
- Ares 20.26,76
- Isuntza 20.30,54
- Pedreña 20.34,50
- San Pedro 20.38,52
- Samertolameu 20.44,46
- Tiran 20.48,36
- Kaiku 20.48,88
- San Juan 21.04,78
- Deustu 21.04,92
- Getaria 21.10,12
- Zumaia 21.12,92
- Mutriku 21.38,88
- Hibaika 22.20,52
Donostiarra izango da Kontxako Banderan arituko den zortzigarren trainerua. Estropadak bukatu ostean txanden zozketa egin dute:
Ustekabea Zarautzek eman du, eta Ondarroak erakutsi du txanponaren beste aldea. Iaz azkarrena izan zen Antiguako Ama, eta aurten zortzigarren geratu da. Zarautz zazpigarrenarengandik bi segundo eta 32 ehuneneko alde estuagatik geratu da banderaren lehiatik kanpo. Eusko Label Ligaren azken aurreko postuan amaitu du Zarautzek denboraldia, eta Bermeon eta Portugaleten play off-ak lehiatu beharko ditu, baina, gaurko sailkapenean goikaldetik dituen Ondarroa, Isuntza eta Ares baino hobeto aritu da.
Zarautzen atzetik, bigarren uretaratuta, Zierbenak markatu du erreferentzia. Bera izan da azkarrena ziabogan (09:41), eta 19:45.18 denboragaz irabazi du sailkatze estropada aurtengo Euskadiko eta Espainiako txapeldunak. Segundo bakarreko alde estuagaz, Hondarribiak egin du bigarren denborarik onena ziabogan. 09:52 markatu du, ostera, Bou Bizkaiak.
Isuntzak eta Ondarroak laugarren eta bosgarren postuetan hasi dute erlojupekoa, hurrenez hurren. Aurreko egunean, nesken taldeek egin modura, Ondarroako taldea zortzigarren eta Lekeitiokoa hamargarren sailkatu dira. Mutriku hamaseigarrena izan da uretaratzen, eta hogeigarren geratu dira.
«Bandera irabaztera». Jon Elortegi Urdaibairen entrenatzaileak helburua lehen zazpiren artean sartzea zenez, «pozik» daudela esan du: «Arraunean ondo egin dugu, lasai. Emaitza ona da. Abuztua ez da izan hilabete ona guretzako, baina, hala ere, gogotsu gatoz Kontxara. Gauzak ondo egiten baditugu, uste dut maila ona emango dugula, ez garela besteak baino astiroago ibiliko». Bermeoko kluba behin-behinean zuzentzen ari den Kudeaketa Batzordeko kide den Gotzon Orbek zehaztu du orain helburua bandera irabaztea dela, eta asteburu bi hauetan horretarako lan egingo dutela.
Iñaki Errasti Ondarroa AEko entrenatzaileak etxera penagaz bueltatuko direla aitortu arren, egindako lanagaz pozik zeudela azpimarratu du: «Estropada ona egin dugu. Erreferentziak onak ziren, estropada guztian Zarautzekin hortxe ibili gara. Gure maila eman dugu».
