Mutriku Zainduz herri ekimeneko zerbitzuak berrezarri dituzte
Udalerrian dauden premiei erantzun ahal izateko, erosketak egin, botikara joan, zakarrak atera edo bestelakoak egiteko zerbitzua erabilgarri dagoela azpimarratu dute zaintza sareko boluntarioek.
Mutriku Zainduz herri ekimeneko boluntarioek jakitera eman dutenez, udalerrian dauden premiei erantzun ahal izateko aurreko hilabeteetan eskaintzen aritu diren zerbitzuak berrezartzea erabaki dute. Besteak beste, erosketak egin, botikara joan, zakarrak atera edo bestelakoak egiteko zerbitzua erabilgarri dagoela azpimarratu dute. “Herrian COVID-19 kasuak areagotu egin dira, eta jendea deika hasi zaigu. Premia dagoela ikusita, zerbitzua berriz aktibatzea erabaki dugu”.
Asteon ipini dute zerbitzua abian, eta laguntza behar izanez gero, 09:00etatik 12:00etara bitartean 679 16 25 07 telefonora deitzeko eskatu dute zaintza sareko kideek. 15 bat boluntariok osatzen dute zaintza sarea; horietatik laurek telefonoaren ardura dute. “Boluntarioak eta zerbitzua behar duen herritarrak zer zerbitzu jaso eta noiz behar duen adosten dute”.
