Ondarroako asteroko nekazal azoka Berdura Plazara bueltatuko da
Martitzeneko azoka Berdura Plazan egingo dute. Batzuk postu finkoetan kokatuko dituzte eta beste batzuk ohiko mahaietan.
Ondarroako udal iturriek jakitera eman dutenez, martitzen eta zapatuetan egiten den nekazal azoka Berdura Plazan egingo dute datorren martitzenetik [irailak 8] aurrera. “COVID-19ak sortutako osasun alarmaren ondorioz, eta ekoizle eta kontsumitzaileen segurtasuna handitze aldera, udalak azoka Zaldupe ikastetxeko jolastokira lekualdatzea erabaki zuen. Orain, ikasturte hasieragaz batera, Berdura Plazara bueltatuko da azoka”.
Iragarri dutenez, lekualdaketa egin aurretik berrantolaketa egin dute; batzuk postu finkoetan kokatuko dituzte eta beste batzuk ohiko mahaietan. Ekoizleen oniritziagaz egin dute berrantolaketa, eta beronen helburua ekoizle eta kontsumitzaileen segurtasun neurriak bermatzea dela nabarmendu dute. “Gure asmoa ekoizle guztiei segurtasuna bermatuz zerbitzua eskaintzeko aukera ematea da”.
Azoka apirilean lekualdatu zuten Zaldupeko aterpera. Udalak zein ekoizleek Zaldupen egon diren etaparen balorazio positiboa egin dute.
