Egurrezko lurzorua jarri diote Etxebarriko frontoiko probalekuari
Uztailaren amaieran amaitu zituzten lanak. 'Zumba' eta dantza ikastaroak ematen ari dira lurzoru berria aprobetxatuta.
Etxebarriko frontoiaren ikuspegia. Frontoiari etekina ateratzen ari dira etxebarritarrak. Azken ikutuen faltan, uztaileko Santixa jaietarako amaitu zituzten frontoiko bigarren faseko lanak, eta jaiak bertan ospatzeko aukera eman zien horrek.
Kontrakantxako marratik hasita, lurzoru osoa egurrezko lurzoru bategaz estali dute bigarren fasean, frontoiari erabilera handiagoa eman asmoz. Beste era bateko ekintzak egin nahi dituzte bertan, eta jadanik zumba eta dantza ikastaroa bertan ematen ari direla azaldu du Jesus Iriondo Etxebarriko alkateak. «Megafonia ere ondo dabil eta gustura ari dira ekintzetako parte hartzaileak».
Frontoia erabilera anitzeko gune bihurtzeko bigarren fasea espero baino gehiago luzatu dela azaldu du udalak. «Arazoak izan genituen enpresagaz eta luzatu egin zen amaiera». Izan ere, 2019ko irailean hasi zituzten lanak, eta hilabete gutxitan amaitzea itxaroten bazuten ere, azkenean ia hamaika hilabete iraun dute. Hori dela eta, Etxebarriko Udalak penalizazioak ezarri dizkio enpresari, proiektuan adostutakoa ez errespetatzeagatik.
Bestalde, ordea, 2019ko aurrekontuetan zehaztutakoa baino merkeago atera zaizkie lanak, 26.000 euro hain zuzen ere. Hor sartzen da baita enpresari jarritako 6.000 euroko penalizazioa.
Aurtengo aurrekontuen inbertsioen ataleko kopuru bat ere frontoiaren hirugarren fasera bideratuta zegoen. Harmailak erostea zuten asmoa, baina COVID-19ak eragindako egoera dela-eta asmo hori momentuz, albo batera uztea erabaki dute.
