Grebagaz bat egin eta "eskola presentzialak gelditzea" exijitzen die IAk agintariei
Instituzio eta agintari politikoen kudeaketa "negargarria" izaten ari dela salatu dute. Lea-Artibai, Mutriku eta Busturialdeko ikasleriari hilaren 15ean greba egiteko eta mobilizazioetan parte hartzeko deia egin diote.
IAko kideak, grebara deitzeko agerraldia egiten. Argazkia: IA. Joan den ikasturteko testuinguru orokorra, funtsean, ez da aldatu IAren ustez: “Ikasturte honen hasieran ere ezjakintasuna eta ezegonkortasuna nagusitu dira berriro. Ezer gutxi genekien ikasturte hasieraz duela aste batzuk, eta honen hasiera bera aldatzen ere ahalegindu dira, neurri eta protokolo faltagatik”. Instituzio eta agintari politikoen kudeaketa “negargarria” izaten ari dela salatu dute.
Errealitate horren aurrean, eta “osasun baldintza egokiak” bermatu arte “eskola presentzialak gelditzea” exijitzen die IAk agintariei. Eta Lea-Artibai, Mutriku eta Busturialdeko ikasleria hilaren 15ean greba egitera eta mobilizazioetan parte hartzera deitu dute. “Helburuak lortzeko beharrezkoa izango da datorren martitzenean [irailak 15] ikasgela guztiak hustu eta kaleak betetzea”. Horren harira, gogorarazi dute Bilboko manifestazioa 11:00etan aterako dela, Sarrikotik; manifestarien artean bi metroko segurtasun tartea gordeko dela esan dute. Hara joateko, gainera, autobusak aterako dira Ondarroatik eta Lekeitiotik, 09:30ean (autobus geltokietatik aterako dira autobusak). Gernika-Lumotik, ostera, trenean joateko dei egin dute; o9:30ean erdiko tren gertokian batzeko deia egin dute.
Protokoloak ere ez direla egokienak diote. “Iruditzen zaigu milaka ikasle ikastetxeetako gela itxietan egunero ordu luzez egotea ez dela maskarillekin eta aireztatzearekin konpontzen”. Eta horren ondorioak ikasle eta familia txiroek ordaindu beharko dituztela gaineratu dute. “Baliabide gutxien dutenak ordainduko dute. Ezin dugu onartu boterea duen gutxiengoaren interes ekonomikoengatik langile klase osoaren bizi baldintzekin horrela jolastea. Horregatik ikusten dugu beharrezkoa ikasturte hasierako greba hau”.
Pandemiaren hasieran bezalaxe, mezu argia plazaratu du IAk hezkuntzako helburuei dagokionez: “Hezkuntzaren gaineko langile kontrola, doakoa, kalitatezkoa eta unibertsala izan dadin”. Hori lortzeko bidean, ikasturte amaierako dinamikari jarraipena emanez, beharrezkoa ikusi du hainbat neurri eta horien berehalako aplikazioa exijitzea:
- Ikasle langileek hezkuntzara sarbidea izan dezaten bermatzea.
- Ikasketa modalitate telematikoak sortutako zailtasun akademikoek ikasleen ikasketa prozesua ez oztopatzea.
- Lan politikoa eta militantea egiteko eskubidea (biltzeko eta manifestatzeko eskubidea, besteak beste) bermatzea.
“Normalitatera” bueltatzearen atzean interes ekonomikoak daudela diote. “Langileriak ekoizten jarraitu dezan, ikasleok ikastetxeetara itzultzea behar dute. Horrez gain, ikasle langileok etorkizuneko lan indarra izateko formazioa jasotzen jarraitzea nahi dute”. Oro har, agintarien kudeaketa “negargarria” ari dela izaten diote: “Begibistakoa da gure osasunarekin jolasten ari direla”.
Egoerari eusteko eskaera batzuk “hankamotz” geratzen direla uste dute, eta, ikasle langileen osasuna eta interesak babesteko “hezkuntzaren gaineko langile kontrola” dute oinarrizko baldintzatzat. Dena dela, osasuna bermatuko duten gutxieneko neurri batzuk exijitzea eta ezartzea ere beharrezkoa dela deritzote, “beti ere, kontuan hartuta erroko arazoa ez dela instituzio burgesen kudeaketa penagarrira mugatzen, baizik eta hezkuntza sistema kapitalistak ikasle langileon osasuna eta interesak ziurtatzeko dituen ezintasun objektiboetara”.
Konfinamenduarekin batera hezkuntza-prozesuan txertatu ziren elementu asko eta asko geratzen etorri direla diote, eskola telematikoak, esaterako. “Hezkuntzaren digitalizazio prozesuaren aurrean aurkitzen gara, zeinetan Google eta Huawei bezalako enpresa pribatuek ikasleon ikasketa prozesuaren eta informazioaren gaineko gero eta kontrol handiagoa duten”.
Langileen osasuna bermatuko duen hezkuntza eredu bakarra langileen kontrolpean egongo dena dela diote, “kalitatezkoa, doakoa eta unibertsala”. Hori, gizarte sozialistaren eraikuntzarekin batera eman behar dela gaineratu dute. “Hitz handiak dira, baina uste dugu gaurtik hasi behar garela gizarte horren hazia ereiten. Horretarako, egun daukagun egoera borrokatzetik hasi behar gara”.
