Musika tresnen bila dabil Lekeitioko Musikaia
Aurten musika tresnak elkarbanatzeak sortu ahal dituen osasun arriskuak direla-eta, intrumentuen falta daukate ikasle txikienek.
Musikaia Musika Eskolak dei berezia egin die etxean musika tresnak gordeta edo erabilerarik barik dituzten guztiei. Instrumentuak atera, hautsa kendu eta bigarren bizitza bat emateko eskaera egin diete.
Lekeitioko musika eskolakoek azaldu dutenez, musika tresnak ikasten hasten diren ikasle txikienek ez dute musika tresna propiorik edukitzen. “Orain arte, asteko eskolaz gain, musika eskolako ikasgela zerbitzua eskaintzen zitzaien ikasketa prozesua aurreratzen joateko”. Baina, aurten, musika tresna elkarbanatzeak sortu ahal duen osasun arriskua dela-eta instrumentuak ezin dira partekatu, eta beraz, Musikaiak ezin du zerbitzu hori eskaini. “Ikasle horiek ezingo dute ikasketa prozesua aurreratu, ez etxean ezta musika eskolan ere”.
Horregatik, etxean musika tresnaren bat gordeta dutenei “eskaini edo alokatzen jarri edo saltzeko” eskaera luzatu diete. “Musika Eskolak eta tresnarik gabeko ikasle zein gurasoek asko eskertuko dute”.
