Batel txapelketak, asteburuan
Zapatu goizean Bizkaiko eta Gipuzkoako txapelketak lehiatuko dituzte Sestaon eta Legution, eta domekan Euskadikoa, Legution. Lea-Artibaiko arraun taldeak ariko dira Bizkaiko titulua lortzeko borrokan.
Bizkaiko, Gipuzkoako eta Euskadiko batel txapelketak jokatuko dituzte asteburu honetan. Bihar goizean lehiatuko dituzte bi lurraldeetakoak; bizkaitarren lehia 10:00etan hasiko da Sestaoko Benedikta eremuan, eta gipuzkoarrena, berriz, 11:00etan Legution. Leku horretan jokatuko dute Euskadiko Txapelketa domekan, 11:00etatik aurrera. Bizkaiko eta Gipuzkoako txapelketetako maila bakoitzeko lehen lau sailkatuek lehiatuko dute Euskadikoa.
Lea-Artibaiko arraun taldeak ariko dira Bizkaiko titulua lortzeko borrokan. Isuntzak nesken gazte mailan izan ezik beste guztietan edukiko du ordezkaritza. Ondarroak kadeteen nesken eta mutilen taldea, eta gazte eta absolutu mailetako nesken taldeekin parte hartuko du txapelketan. Mutriku ez da Gipuzkoakoan egongo.
Aldaketak. COVID-19ak baldintzatuta hainbat moldaketa egin behar izan dituzte aurten federazioek. Data aldaketaz gain, kimu eta txiki mailetakoak ez dira lehiatuko umeen eskola kirola momentuz ez dagoelako baimenduta (ezin dute entrenatu ez lehiatu). Publikorik barik lehiatuko dira txapelketak (Sestaon, esaterako, pasealekua itxiko dute). Eta ez da sailkapen estropadarik egongo, egun bakarrean lehiatuko dira, eta denborarik onena egiten duena izango da irabazlea. “Gehienez bost talde egongo dira estropada eremuan, eta talde gehiago badira txanda desberdinak egongo dira. Denborarik onena egiten duena izango da irabazlea”, azaldu dute Bizkaiko Arraun Federazioaren ordezkariek.
