Euskal Herriko Lehen Mailako aizkolariek "deseroso" sentitzen direla salatu dute
Azken hilabeteetan bizitako egoeraren aurrean, sentitzen duten "ezinegona" azaleratzea erabaki dutela diote. Euren esperientzia kontatzeko agerraldia egingo dute eguaztenean [irailak 23], Diman.
“Azken urteetan soka tenkatuz joan den arren, azken hilabeteetako egoerak ageria utzi du aizkolaritzaren eta herri kirolen etorkizuna kolokan egongo dela bide berdinetik jarraituz gero”. Euskal Herriko Lehen Mailako aizkolariek diotenez, horixe da egoera. Ilusioz betetako taldea osatzen dutela eta gauza berritzaileak probatzeko ideia ugari izan dituztela diote. “Ideia horiek guztiek, baina, onarpen antzua eduki dute”.
Egin dituzten proposamen guztiak herri kirolen, herri kirolzaleen eta herri kirolarien etorkizuna bermatzeko asmoz egin dituztela diote. “Erakundeek, baina, betiko lepotik burua”. Salaketa Lehen Mailan diharduten aizkolari guztien adostasunarekin egiten dutela diote.
Bizi duten egoera aurrez aurre azaltzeko agerraldia egingo dute, eguaztenean [irailak 23], 17:00etan Dimako Garena jatetxean. “Bertan gure bizipenak eta iritziak azalduko ditugu”.
