0-18 urte bitartekoei zuzendutako doako 1.240 bonu banatuko ditu Ondarroako Udalak
Urriaren 17ra bitartean, Turismo Bulegoan eskuratu daitezke doako bonuak. 10 euroko eros ahalmena daukate, eta azpimarratu dutenez, pertsonako bakarra eskatu ahal izango da.
Ikasturte Hasierako Bonoak kanpainaren aurkezpena. Argazkia: Ondarroako Udala Ondarroako Udalak Ikasturte Hasierako Bonoak bonu kanpaina berri abiarazi du Zatozte merkatari elkarteagaz lankidetzan. Ikasturte hasieran egoten den gastua arintzeko asmoagaz, 1.240 bonu ipini dituzte 0-18 urte bitarteko herritarren eskura, adingabe ondarrutar bakoitzeko bana. Zehaztu dutenez, 10 euroko eros ahalmena duten bonuak doan eskuratu ahal izango dira. “Ez da zertan dirurik gastatu beharko; bonua zuzenean emango zaie herritarrei, ume bakoitzeko bana”, esan du Eneritz Basurko Pagoaga alkateordeak.
Gaurtik [irailak 22] hasi eta urriaren 17ra bitartean Turismo Bulegoan eskuratu daitezke bonuak, honako egun eta ordutegian: martitzenetik domekara, 12:00etatik 14:00etara eta 17:00etatik 19:00etara. Azpimarratu dutenez, pertsonako bonu bakarra eskatu ahal izango da. Adingabeak, gainera, ezingo dira joan bakarrik bonua hartzera, eta derrigorra izango da Familia Liburua aurkeztea.
Urriaren 17ra arte erabili ahal izango dira bonuak, kanpainan izena emanda dauden saltokietan. “Kanpainari atxikitutako saltokiek erakusleihoan kanpainaren txartela izango dute jarrita”. Gogorarazi dutenez, saltokietan egiten den erosketaren zenbatekoa 10 euro edo gehiagokoa izan beharko da.
Ikasturte Hasierako Bonoak kanpaina ere COVID-19ak eragindako krisiari aurre egiten planaren barruan ezarri du udalak. Hain zuzen ere, herritarren kontsumo ahalmena areagotzea eta herriko denda eta zerbitzuei laguntza ematea dela esan dute azken bi kanpainen helburu nagusia. Guztira, 3.240 bonu kaleratu dituzte azken bi kanpainetan. “Azken batean herritarrei eta herriko denda eta zerbitzu txikiei laguntzea da gure asmoa”.
Iragarri dutenez, Gabon inguruan beste bonu kanpaina bat egiteko asmoa dute. “Horrez gain, ostalarientzako laguntzak ere bideratzen ari gara. Negua inoiz baino gogorragoa izango da, eta Ondarroan ostalaritzak duen garrantziarekin beraiei ere laguntza eman behar diegula uste dugu”.
