Azaroko ekitaldiak mantenduko dituzte Markina-Xemeinen
Segurtasun neurriak indartu dituzte, eta aforoa oraindik ere txikiagoa izango da.
Markina-Xemeingo kultur aretoa. Argazkia: Markina-Xemeingo Udala Azarorako aurreikusitako ekitaldiak mantenduko ditu Markina-Xemeingo Udalak. Jakitera eman dutenez, udalean ordezkaritza duten bi alderdi politikoek –EAJk eta EH Bilduk– hartu dute erabakia, aho batez, Tokiko Gobernu Batzarrean. “Dena dela, ekitaldiak bertan behera geratu ahalko dira, ospatuko diren astean bertan, unean uneko egoerak horrela eskatzen badu”, zehaztu dute.
Ekitaldiak modu seguruan gauzatu ahal izateko neurriak indartuko dituzte. Alde batetik, baimendutako edukierak oraindik gehiago murriztuko dituzte, eta bestetik, segurtasun eta higiene neurriak areagotu egingo dira.
Aurreikusitako ekitaldiak mantentzeko asmoagaz ados agertu dira Uhagon kulturgunekoak. Kultur ekintzak seguruak direla azpimarratu dute. COVID-19 izurritearen ondorioz, kulturarena sektore kaltetuenetako bat izan dela gogora ekarri dute, eta egoera honetan babestea beharrezkoa dela diote. “Kultur ekitaldiak seguruak dira, segurtasun neurriak asko zaintzen dira, eta zorrotz betetzen dira”.
“Kultura segurua da” ez dela lelo bat esan dute: “sinisten dugu horretan eta hala izateko lan handia egiten da, beraz, ekimenei eutsi nahi diegu sektorea babesteko bai eta herritarrengatik ere”.
Mugak. Egoerak eragindako aforo murrizketek kultur ikuskizunak gutxitzea ere eragin duela azaldu dute Uhagon kulturgunekoek. “Kulturgunea berez, espazio txikia da, eta aforo murrizketekin ia-ia ikuskizunik egin ezinik geratu gara”, azaldu dute. Hori dela eta, zenbait ekimen kenduta, hitzaldiak esate baterako, beste toki batzuetara mugitu behar izan dira. “Beste aukera batzuk hartu ditugu, baina ez da erraza izaten ari beste espazio batzuk bilatzea”.
Uni frontoia esate baterako, ikuskizun batzuetarako handiegia dela argitu dute, eta kostua ere handitu egiten dela. Hala ere, aurrera jarraitzeko asmoa azpimarratu dute. “Ikusle kopurua jaitsi arren gure ekarpena egin nahi diogu kulturaren sektoreari”.
