Mikel Agirre hirugarren sailkatu da 3. mailako aizkora txapelketaren Aramaioko kanporaketan
Egindako lanagaz eta emaitzagaz "oso pozik" dagoela adierazi du ondarrutarrak. Bizkaiko Trontza Misto Txapelketa da bere hurrengo hitzordua, eta Uxue Ansorregi bikoteagaz batera, txapela defendatzera joango da.
2020ko Euskadiko 3. mailako Aizkora Txapelketaren azken bi kanporaketak lehiatu dituzte asteburuan. Zapatuan Agurainen eta domekan Aramaion aritu ziren zortzina aizkolari, eta Mikel Agirre ondarrutarra hirugarren sailkatu zen Aramaioko kanporaketan.
33 aizkolarik izena eman dute aurtengo txapelketan aritzeko, eta hiru kanporaketa jokatu dituzte. Kanporaketa guztietan aizkolari bakoitzak lau kanaerdiko ebaki ditu (hau da, 54 ontzako lau enbor), eta kanporaketa bakoitzetik lehenengo bi postuetan geratu direnak sailkatu dira finalera.
Hortaz, sei aizkolari hauen artean erabakiko da aurtengo 3. mailako txapelduna: Alvaro Garcia, Unai Otaegi, Luis Polanco, Yulen Aranberri, Txomin Amundarain eta Julen Olano.
Domekako saioan Polancok (10 minutu eta 27 segundo) eta Aranberrik (11 minutu eta hiru segundo) lortu zituzten finalerako txartelak. 12 minutu eta 57 segundotan burutu zituen lanak Agirrek. Sentsazio “oso onak” eduki zituela, eta emaitzagaz “oso pozik” geratu dela dio ondarrutarrak: “Hirugarren geratzea ondo baloratzen dut. Finaleko ateetan geratu naiz, orain pena ematen du, baina pentatloia prestatzen aritu nintzenez, ulergarria ere bada. Egurrak pixka bat gogorra izan ziren, baina ondo sentitu nintzen”.
Aranberrigaz txandan aritu zen, eta harek aurrea hartu, eta “hari eusten” aritu zela zehaztu du. Ez zen ezustekorik egon, eta faboritoek ez zuten hutsik egin: “Nafarrek ezin izan zuten etorri. Nafarroan maila handiko jendea dago. Aspaldi ez gara lehian elkar ikusi, eta ez dakigu horiek egon izan balira ere zer gertatuko zen. Nafarrak beti dira gogorra, eta maila altua ematea espero zen”.
Kanporaketa polita izan zela eta antolakuntza oso ona izan zela gaineratu du: “Gauzen egoeran kanporaketa egin ahal izate hutsa ere garaipen bat da”.
Trontza txapelketa. Bi aste barru Bizkaiko Trontza Misto Txapelketa jokatuko du Uxue Ansorregi bikoteagaz batera. Iaz lortutako txapela defendatuko dute, eta horretarako prestatzen ari dira. Oraindik ez dakite zein lekutan lehiatuko duten: “Nahiz eta ziurgabetasun handia egon, gogoz gaude. Denontzat dira momentu zailak. Ez antolatzea ere ulergarria da, baina antolatzen bada, disfrutatu egin behar dugu. Aurrera segitu behar da”.
