Kasu berri gehienak barikuan [urriak 30] erregistratu zituzten (36). Kasu gehien Markina-Xemeinen erregistratu dituzte (13). Dena dela, Ondarroan eta Lekeition ere bakoitzean 12 kasu berri atzeman dituzte; bi herriek gune gorrian egoten jarraitzen dute.
Barikutik domekara [urriak 30-urriak 31-azaroak 1] bitartean 61 positibo berri erregistratu dituzte Lea-Artibain eta Mutrikun. Ondoko herrietan erregistratu dituzte kasu berriak:
- Berriatua: 5 (2 barikuan, 2 zapatuan eta 1 domekan)
- Etxebarria: 8 (7 barikuan eta 1 zapatuan)
- Ispaster: 3 (1 barikuan eta 2 zapatuan)
- Lekeitio: 12 (8 barikuan, 3 zapatuan eta 1 domekan)
- Markina-Xemein: 13 (5 barikuan, 7 zapatuan eta 1 domekan)
- Munitibar: 3 (barikuan)
- Ondarroa: 12 (7 barikuan, 1 zapatuan eta 4 domekan)
- Mutriku: 5 (3 barikuan eta 2 domekan)
Lekeitiok eta Ondarroak, gainera, gune gorrian egoten jarraitzen dute: 100.000 biztanleko 849,83ko tasa dauka Ondarroak, eta 703,84 Lekeitiok. Mutrikuk gune gorritik kanpo egoten jarraitzen du, eta 356,21eko tasa dauka.
Atzoko [azaroak 1] datuak eskuetan, joan den astean [urriak 26tik azaroak 1era] Lea-Artibain eta Mutrikun COVID-19arekin kutsatutako 172 kasu erregistratu zituzten; kasu gehien Ondarroan atzeman zituzten:
- Ondarroa: 45
- Lekeitio: 37
- Markina-Xemein: 37
- Berriatua: 21
- Etxebarria: 12
- Mutriku: 8
- Munitibar: 6
- Ispaster: 4
- Aulesti: 2
Neurri murriztaile gehiago? Beste alde batetik, Eusko Legebiltzarreko kontrol saioan, koronabirusari buruz hitz egin zuen barikuan [urriak 30] Iñigo Urkullu Lehendakariak, EH Bilduk eta Elkarrekin Podemosek egindako galdera banari erantzunez. Urkulluk aitortu zuen izurriaren egungo egoera “larria” dela Araban, Bizkaian eta Gipuzkoan, eta atea ireki zion neurri murriztaile gehiago hartzeari. Hain zuzen ere, aste honen erdian erabakiko du Jaurlaritzak neurri zorrotzagorik behar ote den; asteazkenean eta ostegunean [azaroak 4-5] aztertuko dute. Aukera horien artean legoke “ezinbestekoa ez den ekonomia jarduera oro etetea, etxeratzeko ordua aurreratuta”. Baztertu egin du martxoan ezarritako etxeko konfinamendua berriz ezartzeko aukeraz hitz egitea: “Horretaz mintzo banaiz, alarma gisa ulertuko da, konfinatu egingo garela”. Baina “dena mahai gainean” dagoela ohartarazi du gero.
