Mutriku berriro ere gune gorri izatera pasatu da, positibo berriak erregistratzen jarraitzen dutelako
Azken 24 orduetan 15 positibo berri erregistratu dituzte Lea-Artibain eta Mutrikun: Mutriku (5), Lekeitio (4), Ondarroa (2), Berriatua (1), Markina-Xemein (1), Munitibar (1) eta Ziortza-Bolibar (1). Lekeitiok eta Ondarroak gune gorrian egoten jarraitzen du
Azken 24 orduetan Lea-Artibain eta Mutrikun 15 positibo berri erregistratu dituzte: Mutriku (5), Lekeitio (4), Ondarroa (2), Berriatua (1), Markina-Xemein (1), Munitibar (1) eta Ziortza-Bolibar (1). Eta azken egunetako inzidentzia tasa kontuan edukita, Mutriku berriro ere gune gorri izatera pasatu da; 100.000 biztanleko 543,68ko tasa dauka. Lekeitiok eta Ondarroak gune gorrian egoten jarraitzen dute, 952,25eko eta 593,71ko tasekin, hurrenez hurren.
Mutriku urriaren 26an sartu zen lehen aldiz gune gorrian. Bi egun beranduago, urriaren 28an, berriro ere gune gorritik irten eta eremu laranja izatera pasatu zen. Orain, ostera, berriro ere gune gorrian dago.
Atzo [azaroak 10], gainera, Bizkaiko Foru Aldundiak adinekoen egoitza zentroen sarean kutsatutakoen datuak jakinarazi zituen. Lurralde osoan 58 erabiltzaile daude positibo emanda, horietatik 12 Munitibarko Oizpe egoitzan.
Lurraldeka. Araban, Bizkaian eta Gipuzkoan atzo [azaroak 10] 17.890 proba egin zituzten (15.368 PCR eta 2.522 antigeno). Horietatik 1.401 positibo (%7,8) erregistratu zituzten (1.021 PCR bidez eta 380 antigenoen bidez). Kasu gehienak Bizkaian erregistratu zituzten (676); Gipuzkoan 569 atzeman zituzten, eta Araban 142. Horiei EAEn bizi ez diren herritarren artean atzemandako 14 kasu gehitu behar zaizkie. Kutsatu gehien 40-64 urte bitartekoen artean erregistratzen jarraitzen dute.
Ospitaleratutakoei dagokienez, gaurko [azaroak 11] buletinean Jaurlaritzak ez du datu hori eman: “Informazio sisteman hutsegitea dela eta, oraindik ez dugu ospitaleratze berrien daturik”. Dena dela, ZIUn daudenen datua eman du: atzo [azaroak 11] 133 zeuden, herenegun baino bi gutxiago.