Errigoraren azken kanpainaren emaitza, inoizko emankorrena
Udazkeneko kanpainan inoizkorik ekarpen handiena batu dute euskalgintzarako: 302.000 euro. Ekarpenen horren zati handiena eskatu diren 16.000tik gora saskien balioaren %25ari dagokio.
Errigorako boluntarioak saskiekin. Argazkia: Errigora. 2020ko Nafar hegoaldeko uzta euskarari puzka kanpainako saskiak banatzen hasi da gaur [azaroak 19] Errigora, eta eguna azken kanpainari buruzko balorazioa egiteko probetxatu nahi izan dute. Nabarmendu dutenez, “inoizko baldintza gaiztoenetan” inoiz baino ekarpen handiena batu dute euskalgintzarako: 302.000 euro. “Izugarria da halako baldintzetan herri ekimen bat 302.000 euroko ekarpena biltzeko gai izatea. Bihotzez diogu hitzez azaltzeko zailan den zirrara eragiten digula elkartasun erakustaldi honek”.
Azaldu dutenez, ekarpenen horren zati handiena eskatu diren 16.000tik gora saskien balioaren %25ari dagokio. Lea-Artibain eskualdean, esaterako, 442 saski banatuko dituzte. Honako eran egingo dute banaketa:
- Aulesti. 53 saski guztira (33 beltz, 12 berde eta 8 zuri).
- Berriatua. 32 saski guztira (16 beltz, 10 berde eta 6 zuri).
- Lekeitio. 180 saski guztira (110 beltz, 52 berde eta 18 zuri).
- Markina-Xemein. 68 saski guztira (39 beltz, 21 berde eta 8 zuri).
- Ondarroa. 89 saski guztira (56 beltz, 25 berde eta 8 zuri).
- Ziortza-Bolibar. 20 saski guztira (8 beltz, 9 berde eta 3 zuri).
Iragarri dutenez, azken kanpainan lortutako dirua Nafarroa hegoaldean eta erdialdean euskarari hauspoa ematera bideratuko dute. “Zonaldean behar handiak ditu euskalgintzak lehendik ere, eta diru horrek balioko du, besteak beste, AEKren euskaltegien, bertako ikastolen eta hezkuntza publikoko D ereduko taldeen aldeko dinamiken lana indartzeko. Aurten pandemiak euskara eta euskalgintza hain estu hartu dituen honetan, saskiko 5 euroko ekarpen osagarria egin dugu AEKri, Seaskari eta Sortzenin zuzenean bideratzeko”.
