Antxon Alberdi, Jon Zabala eta Mikel Manzisidor, Gernikako Zesta Torneoaren finalerdietan
Hormaetxea-Urtasun eta Antxon-Zabala bikoteen artekoa izango da finalerdietako bat. Bestean, Manzi eta Beaskoetxea Urkoren eta del Rioren kontra lehiatuko dira.
Jai Alai World Tour zirkuitorako puntuagarria den Gernikako Zesta Torneoa atzo arratsaldean hasi zuten, eta bihar [abenduak 11] lehiatuko dituzte finalaurrekoak, 18:00etan hasita.
Beaskoetxea-Manzi eta Hormaetxea-Urtasun bikoteak zuzenean sartuko dira finalaurrekoetara. Urko Lekerikak eta Julen del Riok Diego Beaskoetxearen eta Mikel Manzisidorren kontra jokatuko dute, eta Alex Hormaetxea bermeoatarrak eta Manex Urtasun irundarrak Antxon Alberdi etxebarritarra eta Jon Zabala markina-xemeindarra izango dituzte aurkari. Bi bikote irabazleek, abenduaren 18an [barikua] lehiatuko dute finala.
Publikorik barik lehiatuko badituzte ere, partiduak ikusteko aukera eskaini dute. Finalerdiak eta finala ETBn emango dituztela iragarri dute.
Final-laurdenak. Atzo arratsaldeko bi final-laurdenetan berdinketa hausteko set-ak jokatu behar izan zituzten.
Lekerikak eta del Riok Jokin Arbe markina-xemeindarraren eta Aimar Aldazabal berriatuarraren kontra lehiatu zuten final-laurdena. Lea-Artibaiko puntistei partiduan sartzea kostatu zitzaien, eta lehen set-a galdu zuten (12-15). Bigarrenean, baina, nagusitasunez aritu ziren (15-10). Berdinketa hausteko set-ean, ezustekoa eman zuten etxeko aurrelariak eta atzelari gasteiztarrak, partidua ia galduta zeukatenean markagailua berdintzea lortu eta irauli egin zuten. Arbek eta Aldazabalek finalaurrekoetarako txartela ia eskuetan zeukaten, 4-1 aurretik joan ziren.
Beste finalaurrekoan ere, partidu ona eta emozio askokoa jokatu zuten Antxon-Zabala eta Goenaga-Mandiola bikoteek. Jon Goenaga mutrikuarrarentzat eta Jon Mandiola markina-xemeinarrarentzat izan zen lehen set-a (14-15). Antxon eta Zabalaren alde, 15-13 amaitu zuten bigarrena. Berdinketa hausteko set-ean, 5-3 nagusitu ziren etxebarritarra eta markina-xemeindarra.
Gazteen aukera. Aritz Erkiaga, Unai Lekerika, Xabi Barandika, Iñaki Osa Goikoetxea, Imanol Lopez… aurten horiek ez dute Gernika-Lumoko Jai Alain jokatzeko aukerarik eduki. Uda hasieran esan zuten abuztuko Grand Slama ez zela egingo, eta urrian Urriko Masterra antolatzeko asmoa bazeukaten ere, azkenean ez zen egin. Hala, izen handiko puntista asko Danian eta Miamin daude, eta horrek gazteenei aukera zabaldu die.
