Lea-Artibaiko eta Mutrikuko puntistek Espainiako Kopa lehiatuko dute
23 urtez azpikoetan lehiatuko dira Eneritz Lizardi mutrikuarra, Maialen Aldazabal berriatuarra, Mikel Manzisidor mutrikuarra eta Danel Mandiola markina-xemeindarra. Elite kategorian Aimar Aldazabal berriatuarra Diego Beaskoetxea gernikarragaz bikotea osatuta ariko da.
Espainiako Kopa lehiatuko dute zapatuan [abenduak 12] Nafarroako Noain herrian, 17:00etatik aurrera. Hiru kategoria daude, eta horietan parte hartzeko aukeratu dituzten hamabi zestalarietatik bost Lea-Artibai eta Mutrikukoak dira.
Emakumezkoen 23 urtez azpikoen partiduagaz hasiko dute jardunaldia. Eneritz Lizardi mutrikuarra eta Ihar Arakistain Berriatuko Zesta Eskolako sopeloztarra, Maialen Aldazabal berriatuarraren eta Naroa Merino tolosarraren kontra lehiatuko dira.
Irailaren amaieran Espainiako Txapelketa irabazi zuten Lizardi eta Arakistain dira faboritoak. Azkenaldian asko jokatu dute elkarrekin, eta konfiantzaz jokatzen dute. Baina, Merinok eta Aldazabalek ere bikote gogorra osatu dute; ondo jokatzen dute eta euren artean ondo ezagutzen dira. “Faboritoak garela esan liteke, udan bikote berdinak jokatu genuelako eta guk irabazi genuelako. Baina, hura distantzia laburrean izan zen, eta orain, luzean ariko gara, beraz, jokoa ez da berdina izango. Baina, helburua beti da irabaztea”, adierazi du Mutrikuko Danok Bat klubeko Lizardik.
Ostean, gizonezkoen 23 urtez azpikoen kategoriakoen txanda izango da. Mikel Manzisidor mutrikuarrak Eduardo Agirre zumaiarragaz bikotea osatuta, Danel Mandiola markina-xemeindarraren eta Aaron Gonzalez Matauco gasteiztarraren kontra jokatuko dute.
Azken partidua gizonezkoen elite mailakoena izango da. Aimar Aldazabal berriatuarra eta Diego Beaskoetxea gernikarra Alex Hormaetxea bermeotarraren eta Manex Urtasun irundarraren kontra ariko dira.
