Amorotoko eta Ispasterko Olentzeroren eta Mari Domingiren ekitaldietarako aurretiaz izena eman behar da
Amoroton hilaren 24an egingo duten ekitaldian parte hartu nahi dutenek posta elektronikoa bidali behar dute Arta Nagusi dantza taldearen helbidera. Ispasterren, ostera, udalaren web orrialdean edo herrian dauden karteletako QR kodeen bitartez izena eman daiteke.
Ezohiko urtea denez, Gabonak ere ez ohiko eran ospatu behar dituzte herritarrek, eta sasoi honetako ekitaldiak ere halabeharrez egoera berrira egokituta egingo dira. Hala, Amoroton eta Ispasterren Olentzero eta Mari Domingiren ekitaldiak egingo dituztela iragarri dute, baina horietan parte hartzeko aldez aurretik izena eman behar da.
Amoroton: Orain arte ez modura, aurten Olentzero eta Mari Domingi kultur etxean egongo dira abenduaren 24an, 18:00etatik 20:00etara. Ekitaldi horretan Amoroton erroldatutako umeek parte hartu ahalko dute. Urtero legez, ekintza Arta Nagusi dantza taldeak antolatuta egingo da, eta zehaztu dutenez, Olentzero eta Mari Domingi aurrez aurre ikusi nahi dutenek posta elektronikoa bidali behar dute hilaren 18a baino lehen: artanagusidantzataldea@gmail.com. Esan dutenez, posta elektronikoa bidaltzen duten guztiei ordu konkretu bat emango diete Arta Nagusi taldeko kideek, eta familia unitate bakoitzak bost minutu edukiko ditu Olentzero eta Mari Domingigaz egoteko. Ezingo da muxurik eman, baina bai aurrez aurre ikusi. Familia bereko kideak batetik sartu eta bestetik aterako dira.
Ispaster: Abenduaren 24an Olentzero eta Mari Domingiri harrera egingo diote, 17:00etatik aurrera, frontoiko probalekuan. Aforo mugatua edukiko dutenez, derrigorrezkoa da aldez aurretik izena ematea. Horretarako udalaren web orrialdean edo herrian dauden karteletako QR kodeen bitartez izena eman dezakete herritarrek. Domekara arteko [abenduak 20] epea dago. Udalerrian erroldatutakoek eta herriko eskolakoek lehentasuna daukatela zehaztu dute. “Izena ematen ez duena ez da sartuko. Izena ematen dutenei emailez baieztatuko zaie ekitaldira sartu ahalko diren edo ez”, zehaztu dute udal ordezkariek. 10 urtetik beherako umeak ekitaldi guztian nagusi baten ardurapean egon beharko dutela gogorarazi dute.
Aulesti: Aulestin ere umeentzako ekintza prestatu du Urzabal guraso elkarteak. Hala, zapatuan eta domekan [abenduak 19-20] Olentzerori gutunak eramateko irteera egingo dute. Zehaztu dutenez, parkean batuko dira, eta Pagodixa baserritik 5-6 kilometrora egongo da helmuga. Irteeran parte hartu nahi dutenek (ume zein nagusi) guraso elkartekoekin jarri behar dira harremanetan; abenduaren 17a da horretarako azken eguna. Eta esan dute irteerarako izena ematen dutenek guraso elkarteari argazkiak eta bideoak atera eta erabiltzeko baimena ematen dietela Irteeraren eguna eta ordua egunotan zehaztuko dituztela esan dute.
