Martxan dago 2021eko Peru Abarka Album lehiaketa
Otsailaren 26ra arte edukiko dute idazleek lanak aurkezteko epea zabalik. Irabazle bakarra egongo da, eta 1.700 euro jasoko ditu
Aste honetan eman dituzte ezagutzera 2021eko Peru Abarka Album Lehiaketaren idazleen ataleko oinarriak. Erein argitaletxeagaz lankidetzan jarraituko du Markina-Xemeingo Udalak aurten ere, eta beraz, Erein argitaletxeak argitaratuko du album saritua.
Ohi modura, album lehiaketa bi ataletan banatuta egongo da: lehenengo, narrazio onena aukeratzeko lehiaketa egingo da; eta, ondoren, aukeratutako narrazio hori ilustratzeko proposamenik onena aukeratuko dute. Horrela, lehiaketa martxan jarri dute idazleentzako epea zabalduz. Idazleek otsailaren 26ra arte edukiko dute lanak aurkezteko epea zabalik.
Kategoria bakarra izango da, helduentzako literatura, eta ipuinak euskara batuan aurkeztu beharko dituzte. Irabazle bakarra egongo da, eta 1.700 euro jasoko ditu. Horrez gain, saritutako lana album formatuan argitaratuko dute.
[IDAZLEEN LEHIAKETAKO OINARRIAK]
Antolatzaileek azaldu dutenez, gaia librea da, eta prosaz zein bertsoz idatzi ta aurkeztu dezakete parte hartzaileek. Hori bai, ipuinak originalak, argitaratu gabeak eta beste inongo lehiaketan saritu gabeak izan behar direla zehaztu dute. “Azken hori ziurtatzeko egileak zinpeko adierazpena egingo du, baldin eta haren lana lehiaketa honetan saritua bada”.
Narrazioek gehienez 12.000 karaktere izan behar dituzte, eta, gutxienez, 9.000 (espazioak barne).
Non aurkeztu. Lanak Markina-Xemeingo Udalaren Erregistro Orokorrean aurkez daitezke edo postaz ere bidali daitezke ondorengo helbidera: Markina-Xemeingo Udala, Peru Abarka Album Lehiaketa 2021, Goiko Portala 3, 48270 Markina-Xemein, Bizkaia.
Narrazio irabazlea aukeratu ondoren, ilustrazio lehiaketa jarriko dute martxan. “Narrazio irabazlea, eta horren behin-behineko itzulpena eskuragarri egongo dira lehiaketaren Facebookean“.
