Autonomoei eta enpresa txikiei laguntzeko aholkularitza zerbitzua jarri du abian Debegesak
Aholkularitza zerbitzua doakoa da eta COVID-19ak eragindako krisiaren ondorioz zailtasun ekonomikoak dituztenei zuzenduta dago. Zabalik dago izen ematea.
COVID-19ak eragindako krisiaren ondorioz zailtasun ekonomikoak dituzten autonomoei eta hamar langile baino gutxiagoko enpresa txikiei zuzenduta dago aholkularitza zerbitzua.”Modu pertsonalizatuan emango zaie arreta, autonomo eta ETE bakoitzaren egoerara moldatuz”.
Enpresaren egungo egoera aztertzea, negozioaren diagnostikoa egitea, etorkizuneko urratsak finkatzea eta diru laguntza eta laguntza programen berri ematea da zerbitzuaren helburua. “Aholkularitza programa honen lehen urratsa, COVID-19aren ondorengo egoera aztertzea izango da. Ebaluazioa egin ondoren, hobetzeko ekintza zehatzak identifikatuko dira, funtsezko atalak kontuan hartuz. Aldi berean, etorkizuneko beharrak asetzeko eskuragai dauden diru laguntza eta laguntza programei buruzko informazioa ere emango da”.
Debabarrenako Garapen Agentziak Gipuzkoako Foru Aldundiarekin lankidetzan abiatu duen zerbitzua doakoa da eta eskualdeko edozein autonomori eta ETE txikiri dago zuzenduta. Izena eman nahi dutenek apirila baino lehen Ane Iturzeta Debegesako Enpresa eta berrikuntza teknikariarekin jarri beharko dira harremanetan, ekintzaile@debegesa.eus helbide elektronikora idatzita edo 943-82 01 10 telefonora deituta.
