Hondakin bereziak jasoko dituzte asteburuan Ondarroan eta Berriatuan
Zerbitzua zapatuan egongo da eskuragarri bi herrietan. Ondarroan, Alamedan egongo da kamioia, 09:00etatik 11:00etara. Berriatuan, ostera, hondakin bereziak plazara eraman beharko dira, 11:00etatik 13:00etara.
Hondakin bereziak batzeko puntu mugikorra ipiniko dute Ondarroan eta Berriatuan zapatuan [urtarrilak 23]. Lea-Artibai Amankomunazgotik horretara bideratutako kamioi bereziak bi orduko geldialdia egingo du herri bakoitzean: 09:00etatik 11:00etara Ondarroako Alamedan egongo da eta 11:00etatik 13:00etara, ostera, Berriatuko plazan.
Zerbitzu ibiltariari esker, herritarrek beste inora bota ezin ditzaketen hondakin bereziak bertara eramateko aukera izango dute. Puntu mugikorrean, besteak beste, honakoak laga daitezke: aerosolak, gai arriskutsuen ontziak, margo eta disolbatzaileen ontziak, autoen iragazkiak, pilak eta bateriak, bonbilak, tonerrak, irratiak, zartaginak, fluoreszenteak, botikak eta erradiografiak, CDak, bideoak, boligrafoak, errotulagailuak eta idazteko materialak, motorreko olioa eta bonbonak.
Iragarri dutenez, zerbitzua hilean behin emango dute Ondarroan eta Berriatuan. Betiere ordutegi berean jasoko dituzte hondakin bereziak. Hurrengo bilketak honako datetan egingo dituzte: otsailak 20, martxoak 20, apirilak 17, maiatzak 22, ekainak 19, uztailak 17, abuztuak 21, irailak 18, urriak 16, azaroak 20 eta abenduak 18.
Amankomunazgoko iturriek azpimarratu dutenez, puntu mugikorrean ez dute traste zaharrik batuko. Eskualdean horretara bideratutako doako zerbitzua erabiltzeko gomendatu dute, baina horretarako, txanda hartu behar dela gogorarazi dute. Zerbitzua erabili nahi dutenek ezinbestekoa dute 900- 10 48 78 doako telefonora deitzea.
