Jaurlaritzak 19:00etako jarduera oro bertan behera uztea proposatu du
Espainiako Gobernuarekin eta autonomia erkidegoekin bilera egin dute gaur Jaurlaritzako ordezkariek, eta hara eraman dute proposamena. Etxeratze agindua 20:00etara aurreratzeko ere eskatu dute. Neurriak zorrozteko eskaeren aurrean, Illa ministroak esan du izurriaren aurka egiteko neurri «gogorrak» ezarrita daudela.
Eusko Jaurlaritzak jakinarazi du zer proposamen eraman duen COVID-19aren inguruan Espainiako Gobernuarekin eta autonomia erkidegoekin egin duen bilerara. 19:00etatik aurrera establezimendu guztiak ixteko eskatu du, eta jarduera klase guztiak bertan behera uzteko; soilik botikak eta auto gidariei zerbitzua emateko errepideko guneak egongo dira irekita. 20:00etatik aurrera kalean inor ez ibiltzeko eskea ere egin du; alegia, etxeratzeko aginduak ezartzen duen muga bi orduz aurreratzea. Herrien arteko joan-etorri guztiak ere mugatzea erantsi du proposamenera. Espainiako Osasun ministro Salvador Illak erantzun du, ordea, jada «gogorrak» direla egun indarrean dauden neurriak, eta itxaron egin behar dela horien ondorioak ikusten hasteko. Horiek horrela, autonomia erkidegoei neurri zorrotzagoak hartzeko eskumenik emateko asmorik ez dutela adierazi du.
Eusko Jaurlaritza esaten ari da, ordea, harago egin behar dela. Bilerara eraman duen proposamenean eskatu du, baita ere, espazio publiko zein pribatuetan, bizikideez aparte, gehienez ere lau pertsonako taldeak onartzeko eskea. Intzidentzia handia duten herrietan, ostatuak itxi egiten dira Araban, Bizkaian eta Gipuzkoan, taldeko kirol jarduerak ere bertan behera geratzen dira, eta irizpide hori bera «orokortzeko» ere eskatu du.
Behin neurriok ezarrita, «hamabostean behin» berrikustea proposatu du Jaurlaritzak.
Labi aholku batzordea datorren astean zen batzekoa, baina egoera txarra dela eta, bilera barikura [urtarrilak 22] aurreratu dute.
