Jaurlaritzak ebatzi du Verter Recycling dela zabortegiko eremuan sortutako kalte esanguratsuen arduradun
Hamar egun balioduneko epean ingurumen kalteak konpontzeko proiektua aurkezteko eskatu dio.
Arantxa Tapia Ekonomiaren Garapen, Jasangarritasun eta Ingurumeneko sailburua ebazpenaren berri ematen. Argazkia: Irekia Ingurumen-erantzukizuneko espedientea aztertu ondoren, Verter Recycling enpresari egotzi dio Eusko Jaurlaritzak ingurumen kalteen erantzukizuna, eta hamar egun balioduneko epean ingurumen kalteak konpontzeko proiektua aurkezteko eskatu diote.
2020ko martxoaren 4an eman zion hasiera Eusko Jaurlaritzak ingurumen erantzukizunaren espedienteari, ingurumen kalteak eta Zaldibarko zabortegirako saiheste eta konponketa neurriak zehazteko. Uren arloan eskumena duen agintaritzari (URA Uraren Euskal Agentzia) kontsulta egin ondoren, azaleko uretan, lurpeko uretan eta lurzoruetan kalte esanguratsuak daudela baieztatu dute.
Jaurlaritzak azaldu duenez, espediente horren hasieran, zabortegiko irristatzearen ondoren sortutako ingurumen kaltearen adierazgarritasun txostena aurkezteko eskaria egin zioten Verter Recycling enpresari. Verter-ek, ekainean, kaltearen adierazgarritasun-txostena aurkeztu zuen, baina, uztailean, administrazioak zuzentzeko eskatu zuen. Eta, azkenean, azaroaren 11n, aurketu zuen txostena Verter-ek.
Verter-ek aurkeztu zuen txostenak “babestutako basaespezieetan eta habitatetan eta azaleko uretan ez dagoela kalte esanguratsurik” ondorioztatzen zuela esan du Jaurlaritzak. “Txostenak, berriz, badio kalte esanguratsuak daudela lurpeko uretan, baina nitratoen gainditze puntual batengatik baino ez, eta ezin izan dela zehaztu kalterik badago lurzoruan, ezin baitira egin lurzoruaren kalitatearen ikerketa egokiak”.
Baieztapen horiek zalantzan jarri ditu Eusko Jaurlaritzak, eta Verter Recyclingi egotzi dio ingurumen-kalteen erantzukizuna, instalazioaren operadore den aldetik. Kalte gehiago prebenitzeko edo saihesteko neurriak har ditzala ere eskatu diote enpresari.
