Oinarrizko produktu eta elikagaien bankua sortu dute Lekeition
Lea-Artibaiko Kontseilu Sozialistak jarri du martxan egitasmoa. Bankuaren zentzua bikoitza dela esan dute: pobrezia egoerari erantzun antolatu bat ematea eta langileriaren autoantolakuntza bultzatzea.
Lea-Artibaiko Kontseilu Sozialistak Lekeitioko oinarrizko produktu eta elikagaien bankua egitasmoa jarri du martxan, auzolana oinarri hartuta. Azaldu dutenez, bankuak zentzu bikoitza dauka: pobrezia egoeran daudenei laguntzea eta langileriaren autoantolakuntza bultzatzea.
“Lekeition ere, geroz eta familia gehiago dira hilabete amaierara justu-justu ailegatzen direnak edo janarian murriztu behar dutenak”. Horren aurrean, “burgesiaren antolaketa dudatan jartzen ez duten iniziatiba karitatiboak gainditu eta langileen arteko elkartasuna antolatzearen beharra” dagoela adierazi dute. “Krisi garai hauetan, geroz eta aberatsagoak dira batzuk, baina horren ondorioz geroz eta gehiago eta geroz eta pobreagoak gara beste batzuk. Bizitzeko oinarrizkoak diren beharrak lortzeko gaitasuna, eta horien kalitatea asko ari dira eskasten”.
Bigarren helburuari dagokionez, behar egoera larriagoan zein arinagoan egon, langileriak orokorrean bizi duen gabezi egoerari aurre egitea bilatzen dute. Horretarako, oinarrizko beharrizanen gaineko “langile kontrola” antolatu behar dela azaldu dute bankuko boluntarioek. “Horri erantzutera dator oinarrizko produktu eta elikagaien bankua. Elkartasun antolatuaren bidez janari eta ezinbesteko beste produktu batzuen bilketa eta gehihen behar dutenen mesederako banaketak egingo ditugu”.
Gabonak aprobetxatuta, bankuak lehen janari bilketa egin zuen, eta “ondo” joan zela esan dute. Dena dela, aurrera begira ere ekarpenak jasotzeko prest daudela adierazi dute. Hori bai, janarien kasuan, galtzen ez diren jakiak hartzen dituztela gogorarazi dute; herriko supermerkatuetan ipini dituzten postuetan utzi daitezke oinarrizko produktuak. “Momentuz oinarrizkoak hartzen ditugu, eta galtzen ez direnak: kontserbak, pasta, lekaleak, higiene produktuak… Aurrerago, izozkailu bat eta erosiko ditugu, eta bestelako jakiak ere hartuko ditugu”.
Hala, dirua edo janaria eman edo txandak betetzeko prest daudenak aurrerapausoa ematera animatu dituzte. Horretarako, telefono zenbaki bat (688 75 64 91) ipini dute Bizum bidez diru ekarpenak egiteko, txandak egiteko edo egitasmoaren parte izateko taldeko kideekin harremanetan jartzeko. “Produktuen beharra dutenek ere telefono zenbaki horretara deitu dezakete”. Horrez gain, dirua batzeko kontu korronte bat ere jarri dute martxan: ES48-2100-3938-2001-0032-1575.
Zehaztu dutenez, bankuak Lekeitioko Gamarra kalean dauka biltegia. “Guztion laguntza beharrezkoa da langileriaren autodefentsarako tresna eraginkorra izan nahi duen egitasmo honi bultzada emateko”.
