Berriatuko Etxe Pintxu kalea eraberritzeko lanak apirilean amaituko dituzte
Urbanizazioko hobekuntzek kaleari norabide bakarra ematea aurreikusten dute. Beraz, lanak amaitu eta gero, ibilgailuak Buztinzuri eta Zelaieta kaleetatik sartu beharko dira, ezinbestean.
Berriatuko Etxe Pintxu kaleko lanak Berriatuko Etxe Pintxu kalea eraberritzeko lanek aurrera jarraitzen dute. Udal iturriek aurreratu dutenez, bost hilabeteko lanen ostean, apirila bueltan amaituko dituzte kalea goitik behera berritzeko lanak. Egingo diren lanei esker, hiru arlotan egingo dira hobekuntzak: irisgarritasunean, azpiegituretan eta urbanizazioan.
Besteren artean, Etxe Pintxu kaleko 6, 8 eta 10 atarietako irisgarritasuna hobetuko dute. “Kalearen eskumako alde guztia eskilarekin beteta egon da orain arte. Alde horretan irisgarritasuna bermatzea ezinezkoa da, eskailera guztiak etxeetako atari aurretara doazelako eta aldapa handia dagoelako. Horri erantzun nahian, hiru atari horien sarrera parean zebrabideak ipiniko dira; zebrabide horietatik guztiz irisgarria izango den ezkerreko aldeko espaloira igarotzeko aukera emango da”.
Erribera kalean, Etxe Pintxu eraikinaren parean espaloia luzatu eta Etxe Pintxu kalekoagaz ere batuko dute. “Hor espaloia amaitu egiten zen, eta egingo diren obrei esker, falta den espaloi zatia egin eta Etxe Pintxu aurreko espaloiagaz batuko da. 2,5 metroko espaloia egingo da hor”.
Urbanizazio hobekuntzei esker, aparkaleku kopurua ugaritu egingo da
Irisgarritasuna hobetzeko lanak egingo direla aprobetxatuta, kaleko azpiegiturak ere aldatuko dituzte. Zehatz esateko, zaharkitutako ur hodiak aldatuko dituzte, eta azpiegitura lan horiekin batera, euri urak eta ur zikinak desberdintzeko hodiak ere sartuko dituzte. “Herrigunean ur hodi guztiak berrituta daude, kale horretakoak berritzea falta zen bakarrik”. Uraren hodiari eraztuna ere ipiniko diote, “ihesaldiren bat dagoenean ura edukitzea ziurtatzeko”. Beharrak, gainera, telekomunikazioentzako hodia sartzeko ere aprobetxatuko dituzte.
Kaleko obrak amaitu ostean, asfaltatze lanak egingo dituzte, eta egingo diren urbanizazio hobekuntzei esker, aparkaleku kopurua gehituko dela azpimarratu dute. Izan ere, kaleari norabide bakarra ematea aurreikusten dute. Ibilgailuak Buztinzuri eta Zelaieta kaleetatik sartu beharko dira ezinbestean; “Etxe Pintxu kaletik soilik irten egin ahal izango da”.
Lanak Gaimaz enpresari esleitu dizkio Berriatuako Udalak 190.000 eurotan (BEZ barik). Lanak egiteko Eusko Jaurlaritzako irisgarritasun sailetik 98.071.44 euroko diru laguntza jaso du udalak, eta Bizkaiko Foru Aldundiko azpiegitura sailetik beste 26.600 euro ere jaso ditu. Ur Partzuegoak beste 14.600 euro ordaindu ditu.
