Euskal filmen proiekzioak eskaintzen hasiko dira Mutrikun, udalak antolatuta
Sarrerak barikuan [urtarrilak 29] 10:00etatik aurrera erosi ahalko dira, Internetez edo turismo bulegoan. Proiekzio bateko sarrerak agortuko balira, bigarren saio bat antolatuko luketela aurreratu dute.
Mutrikuko Udalak antolatuta, euskal filmen proiekzioak eskaintzen hasiko dira Mutrikun. Momentuz lau proiekzio programatu dituzte, eta lehenengoa otsailaren 7an izango da. Proiekzio guztiak euskaraz izango dira, eta Zabiel kultur etxean eskainiko dira. Sarrerak bihar 10:00etatik aurrera erosi daitekez, udalaren webguneko Agenda atalean edo turismo bulegoan, 3 eurotan; Entradium-en webgunetik ere erosi ahal dira.
Azaldu dute hasiera batean film bakoitzaren emanaldi bat programatu dutela. «Sarrerak amaituz gero, beste emanaldi bat antolatuko litzateke. Bigarren saio hori egun berean izango litzateke, 17:00etan».
Dekretuek baldintzatuta. Gaineratu dute programazioa pandemiaren aurka egiteko dekretuek baldintzatuta dagoela. Ondorioz, aurreratu dute aldaketak egon litezkeela emanaldien ordutegian, aretoko aforoan edota egutegian. «Proiekzioa bertan behera utzi behar izatea ere gertatu liteke». Dena dela, aldaketarik egonez gero, horre berri emango dute.
Ekainera arte prestatu duten programazioan iaz estreinatutako filmak jaso ditu udalak, eta hori azpimarratu dute. «Gaurkotasuneko euskal filmen alde egin dugu».
Proiekzioak:
- Otsailak 7: Akelarre (Pablo Aguero). Filmak Zugarramurdiko sorginkeria prozesuaren istorioa kontatzen du.
- Martxoak 7: Ane (David P. Sañudo). Sinopsia: Ane, AHTko obretako segurtasun zaintzaileetako baten alabak bi egun daramatza desagertuta. Gurasoak bananduta eta komunikazio arazoekin dabiltza. Urduri eta kezkatuta, alabaren bila hasi dira.
- Maiatzak 2: Hil kanpaiak (Imanol Rayo). Misteriozko filma Miren Gorrotxategiren 33 ezkil eleberrian dago oinarrituta. Sinopsia: Gerizmendi deituriko baserri batean giza hezur batzuen arrastoak aurkituko dituzte. Ertzaintzari abisua eman eta gero, hezurrak desagertu egingo dira.
- Ekainak 6: Erlauntza (Mireia Gabilondo). Abenduan egindako Mutrikuko Antzerkiaz Blai jardunaldietan antzezlana ikusteko aukera egon bazen ere, orain zine formatuan ikusteko aukera edukiko dute herritarrek. Sinopsia: Lagun talde bat landetxe batean batzen da, lagunetako baten ezkondu aurreko festa ospatzeko. Txikitako lagun talde hartatik, baina, urte asko pasatu dira, eta ezer ez da lehen bezalakoa. Asteburu zoro eta zoragarri bat izan behar zuena, ez hain zoragarri bilakatuko da ezustean.
