Elkarretaratzeak, Etxebarrian eta Markina-Xemeinen, Zaldibarko hondamendiaren urteurrenean
Zapatuan urtebete beteko da Zaldibarko zabortegia amildu zenetik, eta mobilizazioak deitu ditu Zaldibar Argituk. Joaquin Beltran zabortegitik lehenbailehen ateratzea exijituko dute.
Zaldibarko zabortegiko bilaketa lanak. Argazkia: Irekia Zapatuan [otsailak 6] urte bete beteko da Zaldibarko zabortegia amildu zenetik, eta urteurrenean ere, orain arte modura, ekimen ezberdinak antolatu ditu Zaldibar Argitu herri plataformak “Joaquin eta Alberto oroitzeko”. Etxebarrian eta Markina-Xemeinen ere elkarretaratzean batzeko deia egin dute; 13:00etan egingo da elkarretaratzea Etxebarriko Olaia aurrean, eta ordu berean jarri dute batzeko ordua bai eta Markina-Xemeingo Goiko Portalean ere. Zallan, Elgetan, Zaldibarren, Eibarren eta Ermuan ere mobilizazioak deitu dituzte.
Urte hau erantzun argirik eta erantzukizunik gabeko urtea izan dela adierazi du Zaldibar Argituk, eta, beraz, aldarrikapen hori eramango dute kalera zapatuan ere: «Joaquin zabortegitik lehenbailehen ateratzea exijituko dugu. Interes publiko eta sozialak interes pribatuen aurretik jartzea eskatuko dugu. Zaldibarren gertatutakoa ez errepikatzeko bermeak eskatuko ditugu. Erantzukizunak argitzea eskatuko dugu».
Zaldibar Argituren esanetan urte honetan ez dira hain beharrezkoak diren pausoak eman. «Zaldibarren, zaborrarekin batera, eredua ere maldan behera erori zen. Bada garaia, eredu aldaketarako urrats argiak ematen hasteko».
Plataforma “iluntasunari argia emateko” sortu zela adierazi dute, eta urte honetan egin duten modura aldarrikapenak plazaratzen jarraitzeko asmoa daukatela azpimarratu dute : «lanean jarraituko dugu gaia ahanzturan ez erortzeko. Alberto eta Joaquin oroituz, Joaquin aurkitu arte, gure osasunaren eta ingurugiroaren defentsan eta erantzukizun pribatu zein politikoak argitu arte».
Internet bidezko diru bilketa bat egiten hasi da Zaldibar Argitu itsulapikoa.eus atarian herri akusazio modura dituzten gastuak ordaintzen laguntzeko
Diru bilketa kanpaina. Aldarrikapenak plazaratzeagaz gainera, Euskal herriko Eskubide Sozialen Kartagaz batera herri akusazio modura aurkeztu zen Zaldibar Argitu Durangoko epaitegian irekita dagoen zabortegiaren hondamendiaren auzian. Epaiketa horrek eragiten dien gastuei aurre egiteko diru bilketa kanpaina bat abiarazi dute orain. Internet bidezko diru bilketa bat egiten hasi dira itsulapikoa.eus atarian, eta kanpainan parte hartzeko gonbidapena luzatu dute.
Hiru diru kopuruko laguntza eman ahalko da, eta horren ordez oparia jasoko dute kanpainan parte hartzen dutenek: 10 euroko ekarpena eginez gero txapa bat emango dute opari, 20 euroko ekarpena eginez gero banderola, eta 50 euroko laguntza emanez gero txapa eta banderola.
Mobilizazioekin bat. Zaldibar Argitu plataformak deitu dituen mobilizazioekin bat egin eta langileria bertan parte hartzera gonbidatu du LAB sindikatuak. «Hasieratik exijitu dugu langileak aurkitzea, baina afera hau ez da hor amaitzen. Izan ere, erantzukizun politikoak argitzea eta azken ondorioetaraino iristea ezinbestekoak dira, egia ezagutu dadin, justizia egon eta berriro gerta ez dadin bermeak ziurtatzeko», adierazi dute.
Zaldibarko Verter Recycling zabortegian Joaquin Beltranen gorpua aurkitzeko bilaketa lanak. Argazkia: Irekia
LAB sindikatuak zabortegiaren kudeaketa salatu du, bai luizia gertatu zen momentuan, baina baita hondamendiaren aurretik zein ondoren ere. «Verter Recycling enpresaren jardueran, kontrol eta isun faltaz gain, amiantoaren arauz kanpoko pilaketak egon dira urteetan zehar, kasuz kasu kontrolatu behar zirenak. Jaurlaritzak eta Ingurumen sailak, orduan ere, ez zuten ezer egin».
Erantzukizuna ezin dela eremu pribatura mugatu azpimarratu du LAB sindikatuak “eremu publikoak gertatzen ari zenaren gaineko erantzukizun politikoa izan duelako”
Verter Recycling enpresak erantzukizun zuzena duela esan du LABek «hildako langileen gainean eta urteetan zehar Zaldibarko zabortegian egon den jarduera opako, ez jasangarri eta arriskutsuaren aurrean». Baina erantzukizuna ezin dela eremu pribatura mugatu azpimarratu dute, eremu publikoak gertatzen ari zenaren gaineko erantzukizun politikoa izan duelako. «Arduradun horiek izen abizenak eta ardura politikoak dituzte».
Lanen egoera. Bestalde, Zaldibarko zabortegian egiten ari diren larrialdi jarduketen eta bilaketa prozesuaren egungo egoera azalduko dute zapatuan Josu Erkoreka lehendakariorde eta Segurtasuneko sailburuak eta Arantxa Tapia Ekonomiaren Garapeneko, Jasangarritasuneko eta Ingurumeneko sailburuak. Zabortegira bisita egingo dute lehenengo.
BERRIAk egindako dokumental laburra:
