Mugikortasun arazoak dituzten adin nagusikoek ere erabili ahalko dute Markina-Xemeingo Auzo-taxi zerbitzua
Mugikortasun arazoa daukaten epe horretan erabili ahalko dute zerbitzua. Egiaztagiria beharko dute horretarako.
Markina-Xemeingo taxien geltokia. Markina-Xemeingo Udalak eta udal lizentzia daukaten herriko taxistek hitzarmen berria sinatu dute, eta berritasun batzuk edukiko ditu hemendik aurrera Auzo-taxi zerbitzuak.
Horietako bat, erabiltzaileei dagokiena izango da. Izan ere, hemendik aurrera, nahiz eta auto eta gidabaimenaren jabe izan, epe zehatz batean mugikortasun arazoren bat daukaten adin nagusiko herritarrek ere, zerbitzu horretaz baliatzeko aukera edukiko dute. Udal ordezkariek zehaztu dutenez, mugikortasun arazo hori ziurtagiri bategaz egiaztatu beharko da, errehabilitazio edo medikuaren ziurtagiri bategaz, esate baterako. “Udalak edozein momentutan eskatu ahalko dizkie behin behineko mugikortasun arazo hori egiaztatzeko agiriak”. Erabiltzaile horiei epe jakin baterako auzo-taxi txartela emango die udalak.
Aldaketak egongo dira bai eta ere bidaia kopuru eta tarifei dagokionez. Astean, gehienez, 6 bidaia egin ahal izango dituzte erabiltzaileek, hiruna joan-etorri. Eta, hilean, gehienez, 20 bidaia egin ahalko dituzte. Bidaia bakoitzeko 3 euro ordaindu beharko dituzte erabiltzaileek.
Auzo-taxi zerbitzuak herriko baserri-auzoak kaleagaz lotu eta baserri-auzoetan erroldatuta dauden herritarrentzat antolatutako prezio oneko taxi zerbitzua ematea du helburu.
