Zaldupe eskolako jolastokia itxita egongo da asteburuetan, apurketak egin dituztelako
Esan dutenez, gutxienez bi asteburutan egongo da itxita jolastokia. Kalteak eragin dituzten gehienak identifikatuta dituztela gaineratu dute.
Zaldupeko naturguneko kalteak. Argazkia: Zaldupe eskola. Azken asteburuetan Ondarroako Zaldupe eskolako eraikin barruan eta jolastokian hainbat apurketa egin dituztela eta, jolastokia asteburuetan ez zabaltzea erabaki dute udalak eta eskolak berak. Gutxienez bi asteburutan (otsailaren 6, 7, 13 eta 14an) itxita egongo dela esan dute. “Abenduan eskolako jolastokia asteburuetan zabaltzea erabaki zuten Zaldupek eta udalak, gazteek asteburuetan ere aterpedun jolasgune bat edukitzeko eta txikiek eskolaren atzealdean dagoen naturguneaz gozatzeko. Baldintza bakarra tokia behar bezala zaintzea zen, baina ez da horrela izan”.
Jolastokia zabaltzea erabaki zenetik hainbat gertaera egon direla azaldu dute. Besteren artean, jolastokiko hesiak apurtu, ikastetxe barrura sartu, kamerak, bozgorailuak eta argi fokuak apurtu eta barruko materiala ere atera dituztela esan dute. “Herritar gehienek erabilera egokia egiten badute ere, egoera jasangaitza bihurtu da azken asteetan, gero eta apurketa gehiagogaz. Hori dela eta, eskolako jolastokia itxita egongo da, gutxienez, hurrengo bi asteburuetan”.
Zaldupe eskolako kanpoko beirateetako bateko kalteak. Argazkia: Zaldupe eskola.
Tarte batean itxita eduki eta gero udalak eta eskolak jolastokia berriro ere zabaltzeko asmoa daukaten arren, ohartarazi dutenez, halakoak ostera ere gertatuko balira, asteburu guztietan itxita geratuko litzateke. “Astelehenero halako apurketekin aurkitzeak kalte handia eragiten dio ikastetxeari eta bere ohiko jardunari”.
Jolastokiko ateak berriro zabaltzen dituztenean, kalteak eragin dituztenek sarrera debekatuta edukiko dutela azpimarratu dute udal ordezkariek, “asteburuetan jolastokia eta naturgunea behar bezala erabiltzen dutenek merezi ez duten zigorra jaso ez dezaten”. Kalteak eragin dituzten gehienak ere identifikatuta dituztela esan dute. “Udaltzaingoak ikerketa bat abiarazi du bakoitzak zer egin duen zehaztu eta ardurak eskatzeko. Adin txikikoen kasuan, beraien gurasoekin hitz egingo dute”.
Zaldupe eskola kanpoko kameretako bat, apurtuta. Argazkia: Zaldupe eskola.
Jolastokiko sarrailetako bat, apurtuta. Argazkia: Zaldupe eskola.
